ئەمڕۆژانە رۆژهەڵاتی کوردستان سەرەڕای هەموو کێشە و ئارێشە و تەنگ و چەڵەمەکان و قەیرانە جۆراوجۆرەکان، دیاردەیەکی جەرگبڕ لە هەناوی خۆیدا تاقی دەکاتەوە، دیاردەیەک کە دەبێ دەمار و هۆکارەکانی لە گشتی بوارە نالەبارەکانی ژیانی تاک و کۆمەڵگەی کوردستاندا، بۆی بگەڕێین. زنجیرەیەک خۆکوژی لە هەموو شار و ناوچەکانی کوردستان بەبێ ئەوەی سەرنجی ئەوتۆی بوارە پێوەندیدارەکان رابکێشێ، هەناسە لە گەنجان و لاوانی کوست کەوتووی کورد دەبڕی. وەک شاعیر دەڵێ کورد هەموو جۆرەکانی مردنی پێ تاقی کراوەتەوە و تاقی کردۆتەوە، کەواتە خۆکوژی تاکەکانی ئەو کۆمەڵگەیە بە هۆکاری جۆراوجۆری نێوخۆیی و فەرهەنگی و نایەکسانی رەگەزەکان و نالەباری رەوشی و …. هتدیش دیاردەیەکی نائاشنا نیە، بەڵکو زۆر جار خودی نالەباری توخمەکانی کۆمەڵگە هۆکار و بەرهەمهێنەری ئەو دیاردەیە بوون. ئەگەرچی لە کەودان و دابێژتنی هۆکار و فاکتەری ئەو دیاردە کارەساتبارە لە توانای نووسەر بەدەرە و، ئەرکی کۆمەڵناسان و پزیشک و ناوەندە دەروونناسییەکان دەبێ بە وردی لەسەر ئەو بابەتانە توێژینەوە و کۆڵینەوە بکەن، بەڵام خراپ نیە لێرەدا ئاماژە بە کەمکاری و پشتگوێ خستن و گوێ پێ نەبزووتنی هەندێک لەو لایەنە پێوەندیدارانە بکرێ.
ئەوەی کە شانسی ژیان تاقە جارێکە، ئەوەی کە گیروگرفتەکان قەت کۆتاییان پێ نایە، خۆکوشتن رێگەچارە نیە، خۆکوژی زوڵمە لەخۆ و کەسوکاری خۆ و …. لە دواییدا خۆکوژی کودیتایە لەو تاکە دەرەفەتەی بۆ ژیان هەمانە، شتێکی حاشاهەڵنەگرە.
باس کردن لە سیاسەتی کۆماری ئیسلامی، چەوتی ژیان لە سایەی ئەو دەسەڵاتەدا، پیلانگێڕی و هەوڵەکانی دەسەڵاتبەدەستانی تاران دژی کورد، پشتگوێ خستن و تاڵانی سامانی نیشتمانی کوردەواری و درێژەی پراکتیکی فتوای کوشتنی کورد لە لایەن رێژیمەوە و دوژمنانە سەیرکردنی تاکی کورد و دەیان و سەدان لاریی دیکە، بابەتێکی سواوە و لە کەس شاراوە نیە. کەواتە لێرەدا بە بێ گەڕانەوە بۆ دامودەزگەی رێژیم و چاوەڕوانی کارێکی خێر لە داگیرکەران، دەبێ ئەو پرسیارە لە خۆمان بکەین ئایا کۆمەڵگەی کورد بە گشت پێکهاتە و رێکخرا و لایەنییەکانەوە لە نێوخۆ و دەرەوە چ هەنگاوێکی کردەوەیی بۆ سووک کردنی هەندێک لەو بارە قوورسەی تاک ناچار دەکا هەناسەی خۆ راگرێ، کردوە. ئایا جگە لە هەواڵ گەیاندن و بەداخبوون و سەرەخۆشی، ئایا جگە لە گۆڕنانی تەرمی بێ نازی لاوی کورد کە بە قەد گراناییەکانی ژیانی ئاوات و ئارەزووی نەپشکووتووی لە سنگدا تەرمەکە، کۆمەڵگەی کوردی و تاکەکانی، هەوڵی لە گۆڕنانی تاکە هۆکارێکی ئەو کودیتایەیان داوە. ئایا کۆمەڵگەی کوردی و بەتایبەت چینی خوێندەوار و دەستڕۆیشتووی کۆمەڵگە جگە لە فاتیحایەک هیچ تەزوویەکی هەست کردوە لەشی بتەزێنێ، ئایا رێکخراو و دامەزراوە مەدەنییەکانی نێوخۆ توانیوییانە بە جۆرێک لە جۆرەکانی خەمێکی گران لەو دەردە گرانە بخۆن. ئایا کۆمەڵگەی پزیشکی کوردستان تەنیا لە فکری ئەوە دایە نەخۆشێک زیاتر سەردانی بکا، تا پووڵی ویزیتێک زیاتر بستێنێ، ئایا چینی پیاوان و ژنانی ئایینی کۆمەڵگە بە هەموو ئایین و ئایینزاکانەوە کە، لە هەموو ئایینەکاندا خۆکوشتن گوناحێکی گەورە و نەبەخشراوە، توانیویەتی تۆزە شوێن پەنجەیەک بخاتە سەر ئەو کوانە چڵک کردوە، ئایا بە هەمووانەوە لە بیرمانە ژین گەورەترین سامانە، مەزنترین و چڵەپۆپەی ئەو سامانەش لاوانن. ئایا نابێ نقورچێکی توند لە کۆمگەڵگەمان بگیردرێ هەتا راچڵەکێ، خۆ سوور دەزانین، وڵاتمان داگیرکراوە، کوشتنمان حەڵاڵە، نەبوونمان سەرکەوتنە بۆ داگیرکەرانمان، ئەدی کۆمەڵگەی ئێمە بۆ هێندە بە سانایی بەسەر ئەو چەشنە دیاردانەدا تێدەپەڕێ. چینی خوێندەواران و بەتایبەتی کۆمەڵگەی پزیشکی و دامەزراوە مەدەنییەکان لە ئاست چی کۆمەڵگەدا بەرپرسیارن، ئایا من وەک تاک تەنیا لە کەڵەکەی پوول و دراو و سامان بۆ خۆم و کەسوکارم بەرپرسیارم، ئایا دایک و باوکانی کورد تەنیا لە زگی منداڵیان بەرپرسیارن، ئایا تاک و کۆمەڵگە تەنیا لە پاراستنی ئەو فەرهەنگ و سامانە مەعنەوییە بەرپرسیارن کە پێمان گەیشتوە، ئایا کۆمەڵگە تەنیا لە بەرهەمهێنان و بەکارهێنان بەرپرسیارە یان، گرنگ چۆنێتی بەرهەمهێنان و چۆنێتی بەکارهێنانە.
چونکی تاوانی ئەو کارەساتە رەهەندێک و لایەنێک نیە، بزووتنەوەی رۆژهەڵاتیش دەکەوێتە بەر ئاماژە و ئەو بەشەش کەموکوڕی خۆی لەو بارەیەوە پێوە دیارە. ئەو ماوەیە دەکرێ بڵێین رۆژ نەبووە هەواڵی خۆکوژی بڵاو نەکرێتەوە، بەڵام ئایا لە ئاستی دەنگ و رەنگی حیزبەکانی رۆژهەڵاتدا جگە لە کورتە هەواڵیک، چالاکییەک، روونکردنەوەیەک، بەرنامە و پڕۆگرامێک دیتراوە، کە نیشانەی راچڵەکانی ئەو بزاڤە ببێ. ئەو کارەساتەی بەرۆکی کۆمەڵگەی گرتوووین زۆر ئاو هەڵدەگرێ، تەنانەت قسە لەسەرکردنیشی ئاسان نیە، بۆیە پێویستە ببێ بە خەمی تاک بە تاکمان، پێویستە کوژانەوەی چرای ژینی هەر قوربانییەکی ئەو دیاردەیە، کۆڵان بە کۆڵان، گەڕەک بە گەڕەک و …. و هەموو وڵاتمان راتڵەکێنێ.
