کاروانی ئازادیخوازیی نەتەوەی کورد بە هیچ هەڕەشە‌و هێرشێک ناوەستێ

کۆمەڵگەی مەدەنی‌و بزووتنەوەی ئازادیخوازی لە هەموو بەشەکانی کوردستان، سەرەڕای ململانێ‌و خەبات هەم لە گەڵ کۆنەپەرستیی نێوخۆیی‌و هەم لەگەڵ پیلان‌و سەرکوتی داگیرکەرانی کوردستان، لە گەشەکردن‌و بەرەوپێشچوون دایە.
لە ڕۆژهەڵاتی کوردستان، وێڕای درێژەی ڕاونران‌و گیرانی چالاکانی بوارەکانی سیاسی، کولتووری، ژینگەپارێزی‌و مافی مرۆڤ، لەم دوایانە دا ژمارەیەک لە ژنان لە شاری بۆکان بوون بە ئامانجی هێرشی دڕندانە‌و تیزابیان پێدا کرا. ئەم هێرشانە، ڕێپێوانی ناڕەزاییدەربڕینی خەڵکی بۆکان لە ئیوارەی٢٥ی پووشپەڕی بە دوا دا هات. سەرەڕای هێرشی مەئموورانی ئەمنیەتی بۆ سەر بەشدارانی ڕێپێوان، ئەوان بە دەنگی بەرز ئەم تاوانەیان مەحکووم کرد. هاوکات، ژنان‌و پیاوانی کورد‌و ئێرانی لە تۆرە کۆمەڵایەتییەکان‌و لە ڕێگای یادداشت‌و نووسینی تایبەتەوە، هێرش بە هۆی تیزاب‌ بۆ سەر ژنان‌و هێرش‌و سووکایەتی بۆ سەر ژنانی چالاک‌و یەکسانیخواز لە دنیای مەجازییان‌دا بە بەرهەم‌و بەروبووی یەک عەقڵیەت ناو برد‌و هەر دوو جۆرە هێرشیان ڕسوا‌و مەحکووم کرد.
لە باکووری کوردستانیش، شوێنی کۆبوونەوەی لاوانی سۆسیالیست کە بە نیازی هاوکاری‌و بەشداری لە ئاوەدانکردنەوەی کۆبانێ چووبوونە شاری پرسووس لە سەرسنووری باکوور‌و خۆراوای کوردستان، ڕۆژی شەمە 20ی جولای بوو بە ئامانجی تەقینەوەیەکی تێرۆریستی. بە هۆی ئەم تەقینەوەیە 32 کەس لە لاوان گیانیان لە دەست دا‌و زیاتر لە سەدکەسیان بە توندی بریندار بوون. ئەگەرچی داعش بە تاوانباری سەرەکیی ئەم هێرشە تیرۆریستییە دەزانرێ، بەڵام دەوڵەتی تورکیە‌و حیزبی ئاکەپە بە هۆی لە ژێرپرسیاردابوونی جۆری پێوەندی‌و هەڵسوکەوتیان لە گەڵ داعش‌و دژایەتیان لە گەڵ پێکهاتنی کانتونەکان لە خۆراوای کوردستان، بوون بە ئامانجی شەپۆلێکی گەورەی خۆپێشاندان‌و ناڕەزایەتیدەربڕین کە نزیکەی 20 شاری تورکیە‌و یەک لەوان ئەستانبولی گرتۆتەوە.
ئەم هێرشانە لە کاتێک‌دا ڕوویان داوە کە هێرش‌و شەڕفرۆشیی تیرۆریستانی داعش بەرامبەر نەتەوەکەمان لە باشوور‌و خۆراوای کوردستان بەردەوامە. لە ڕۆژهەڵاتی کوردستانیش، لە گەڵ ئەوەی ڕێژیمی کۆماری ئیسلامی ڕۆژی 14ی جولای لە ڤییەن ڕێککەوتنی ناوکیی لە گەڵ گرووپی 5+1ئیمزا کرد، حیزبی دیموکراتی کوردستان ڕای گەیاندوە سەرەڕای ئەو گۆڕانانەی ئەم ڕێککەوتنە لەوانەیە لە پێوەندیی ئێران‌و کۆمەڵگەی نیودەوڵەتیی دا پێکی بێنێ، بزووتنەوەی نەتەوەیی‌و خەباتی ئەم حیزبە بە گوڕتر لە پێشوو بەردەوام دەبێ.
لە ژماره‌ ٦٦٠ ی رۆژنامه‌ی “کوردستان”دا بڵاو بۆته‌وه‌