ئەو باس و خواسانەی ناوە‌ناوە سەبارەت بە پرسی “یەكگرتن” لەنێو بلوكبەندی حیزبە سیاسی‌یەكان دەبینری، هێندەی هەوڵێكە بو لێكترازانی زیاتر و لێدان لە بەرامبەر، هێندە هەوڵێك نیە بو یەكگرتن!
گەشتێكی خێرا بە نێو توڕە كۆمەڵایەتی‌یەكان و رامان لە هەڵسوكەوتی خوازیارانی بەناو یەكگرتنەوە پێمان دەڵێ چۆن لەژێر ناوی “یەكگرتنەوە”، پەلاماری هەموو دەنگێك و هەموو جیاوازییەك و هەموو رەخنە و رایەك دەدرێ تا ئاستی سڕینەوەی هەندێك لایەنی سیاسی!
خوازیارانی “یەكگرتنەوە” هەندێك جاریش تا ئاستی كومێدی بوون دەرۆن بەوەی كە بە پاتەك لێدان لە بەرامبەر و، هەڵخەڵه‌تانی چەن كەسێك بو لای خویان، جاڕی یەكگرتنەوە لێدەدەن و چەند نمایشێكی تەلەفزیۆنیشی بۆ رێكدەخەن و هەوڵ دەدەن ئەم دەستبردن و پاتەك لێدانە وەك یەكگرتنەوە بە خەڵكی بفرۆشنەوە، نمایشێكی تەلەفزیۆنی گاڵتەجاڕانە كە زیاتر كار لەسەر سوككردنی هەڵگەراوەكان دەكا تا یەكگرتن. ئەوەی لە پشت ئەم ژێست گرتنە بە ناوی یەكگرتنەوە دەبینرێ هەمان هەوڵی ئینشعابە، هەوڵێك كە جاری یەكەم تێی‌دا سەركەوتوو نەبوون لەسەر پانكردنەوەی رەخنەگران و ناڕازیان و ئەوجار بە ناوی یەكگرتنەوە دەیانەوە ئاداریان بە سەر پادارەوە نەمێنێ!
بە پێچەوانەی ئەو تێگەیشتنە باوەی لە یەكگرتن هەیە، یەكگرتن، سڕینەوەی جیاوازییەكان نیە، هێندەی كۆكردنەوەی جیاوازییەكان و داڕشتنی فۆرمێكی هاوبەشی دێموكراتیكە بو پێكەوەبوون، كە ماف و ئەركی هەموو لایەك تێی‌دا پارێزراو بێت و هەموو لە زەرفێكی هاوبەش‌دا بتوانن تەعبیر لە خویان بكەن و رووبەڕووی هەڵاواردن نەبنەوە.
بە تەعبیرێكی‌تر یەكگرتن تەنیا كوكردنەوی پرش‌وبڵاوییەكان نیە، هیندەی هەڵدانی چەترێكی هاوبەشە بو پرش‌وبڵاوییەكان و ئاراستەكردنێكی هاوبەشی دێموكراتیكە بۆ هەمووان بە جۆرێك كە هەمووان خویانی تێدا ببیننەوە.
لەگەل ئەوەش یەكگرتن تەنیا كوكردنەوەی ئاسەوارەكانی ئینشعاب و لێکترازان نیە هیندەی كاركردنە بو بودنیادنانی داهاتووی هاوبەش كە لە ئیستادا نابینرێ، ئەو كاتەش دەتوانین بە وێستگەی یەكگرتن بگەین كە كوتایی بەم ژاوەژاوە و دیماگۆجی‌یە بە ناوی یەكگرتنەوە بیت.
لە ژماره ٦٩٤ ی رۆژنامه‌ی “کوردستان”دا بڵاو بۆته‌وه
