بەڕێوەبەری گشتیی ژووری بازرگانیی پارێزگای خوزستان لە باشووری ڕۆژئاوای ئێران ڕایگەیاند، لە هەفتەیەكدا نزیكەی 17 هەزار تۆن كاڵای ئێرانی لە دەروازەی جەزابە هەناردەی عێراق كراوە.
محەممەد نەجەفیان، بەڕێوەبەری گشتیی ژووری بازرگانیی شاری ئەهواز، ناوەندی پارێزگای خوزستان لە باشووری رۆژئاوای ئێران بە ئاژانسی هەواڵیی ئێرنای ئێرانی راگەیاند “هەفتەی ڕابردوو 16 هەزار و 919 تۆن كاڵای جۆراوجۆری ئێرانی لە كەلوپەلی بیناسازی، بەروبوومی كشتوكاڵی و خۆراك لە رێگەی دەروازەی جەزابە ـ شیب هەناردەی عێراق كراون”.
نەجەفیان دەڵێ هەزار و 142 ئۆتۆمبێلی بارهەڵگری ئێرانی و 477 ئۆتۆمبێلی بارهەڵگری عێراقی لە رێگەی دەروازەی جەزابە ـ شیب، كاڵاكانیان گواستووەتەوە عێراق، هۆكاری جیاوازیی ژمارەی ئۆتۆمبێلەكانی ئێران و عێراقی بۆ چۆنێتی و توانای باركردن گەڕاندەوە.
بەڕێوەبەری گشتیی ژووری بازرگانیی شاری ئەهواز گوتیشی “لەبەرئەوەی عێراق هاوردەكردنی 29 جۆر بەروبوومی كشتوكاڵی لە رێگەی دەروازە سنوورییەكانی باشوور قەدەخەكردوە، زۆربەی هەناردەی بەروبوومی كشتوكاڵی لە رێگەی دەروازەی شیب، پیاز و میوەیە، سەرەڕای پێداویستیی خۆراك لە ماوەی رابردوو بەرهەمی شووشە، كریستاڵ، ئۆكسیدی ئاسن، مافوور، بەرهەمە پلاستیكییەكان، یۆنۆلێت، گرانول و مۆبیلیات هەناردەی عێراق كراون”.
ڕۆژی 31-08-2020 حەمید حوسێنی، ئەندامی ئەنجوومەنی كارگێڕیی ژووری بازرگانیی عێراق – ئێران رایگەیاند، لە پێنج مانگی رابردوودا ئێران لە رێگەی دەروازە سنوورییەکانی عێراق و هەرێمی کوردستانەوە بە بەهای 2.4 ملیار دۆلار كاڵای هەناردەی بازاڕەكانی عێراق كردووە.
حەمید حوسێنی بە ئاژانسی هەواڵی فارسی راگەیاند “ئێران مانگانە بە بەهای نزیكەی 500 ملیۆن دۆلار كاڵای هەناردەی عێراق كردووە، ئەمەش پڕۆسەی هەناردەی بوژاندووەتەوە”.
لە 13-08-2020 باڵیۆزی ئێران لە بەغدا رایگەیاند، ئێران و عێراق رێککەوتوون لەسەر زیادکردنی قەبارەی بازرگانی نێوانیان بۆ 20 ملیار دۆلار لە ساڵێکدا.
سەرچاوە: “ڕووداو
