نوێنەرێكی مەجلیسی شوورای ئێران، باسی لە بێسەروشوێن بوونی ١٧ پەروەندەی گەندەڵی كردوە كە لەم مەجلیسەدا خەریكی تاوتوێ كردنیان بوون.
حەسەن نەورۆزی، نوێنەری شاری ڕێبات كەریم لە مەجلیسی شوورای ئیسلامیی ئێران حەوتووی ڕابردوو بە نیسبەت ونبوونی چەندین پەروەندەی گەندەڵیی كاربەدەستانی وریا كردبۆوە.
نەورۆزی لە مەجلیسی شوورادا ڕایگەیاندبوو كە، ئێمە بەردەوام باس لە گەشەی ئابووری دەكەین بەڵام هیچ بەرنامەیەكمان بۆ ڕووبەڕوو بوونەوە لەگەڵ گەندەڵیی ئابووری نییە كە ئەم وڵاتەی تووشی قهیران كردوە، نموونەكەشی ونبوونی ١٧ پەروەندەی گەندەڵی لە مەجلیسی هەشتەم دایە كە ئێستا هیچ شوێنەوارێكیان لێ نەماوە، من دەمهەوێ ٢ نموونە لەم پەروەندانەم پێ بدەنەوە تا بۆ جارێكی دیكە چاویان پێدا بخشێنمەوە، بەڵام ئەم هەلەم بۆ ناڕەخسێنن.
ئەم نوێنەرەی مەجلیس كە ئەندامی كۆمیسیۆنی ئەسڵی ٩٠ی مەجلیسی هەشتەمیش بوو، لە لێدوانێكدا بۆ ڕۆژنامەی ئێران گوتوویەتی: “ساڵی ٨٩ لە كۆمیسیۆنی ئەسڵی ٩٠دا گەلێك پەروەندە لە بابەت گەندەڵییە ئابووری و ماڵی و ئیدارییەكان هاتنە گۆڕێ كە هێندێكیان هەر ئەو كات داخران و هێندێكی دیكەش پاش كۆتایی كاری مەجلیس هەر لە كۆمیسیۆن مانەوە تا مەجلیسی نۆیەم پێیان ڕابگا.
ناوبراو لە درێژەی قسەكانیدا گوتوویەتی: بەم حاڵەش لە خولی دواتردا من نەمتوانی بچم بۆ مەجلیس، بەڵام هەواڵنێرەكان بۆ وەدەست هێنانی زانیاری سەبارەت بە هێندێك لە پەروەندەكانی گەندەڵی بە بەردەوامی پێوەندییان بە منەوە دەگرت، پاش ئەوەی كە بە شوێن ئەم پەروەندانەدا گەڕام بۆم دەركەوت كە هیچ سەروسۆراغێك لەم ١٧ پەروەندەیە نەماوە و كەس نازانێ چیان بەسەر هاتووە.
ئەم نوێنەرەی مەجلیس وەك نموونەی هەرە بەرچاوی ئەم پەروەندانە ئاماژەی بە پەروەندەی ٣ هەزار میلیاردی و لادان و سەرپێچییەكانی ڕێكخراوی دابینكردنی كۆمەڵایەتی و بازاڕی دراو و بابەك زەنجانی و پەروەندەكانی دیكەی گەندەڵی كردووە كە لە ماوەی سەركۆمار بوونی ئەحمەدینژاددا ڕوویان داوە و ناوبراوی وەك ڕێچكەشكێنی دەوڵەتەكانی دیكە لە بابەت سەرهەڵدانی ئەم گشتە گەندەڵی و لادانە ناساندووە.
بە شێوەیەك كە پلەبەرزترین كاربەدەستێكیش كە تا ئێستا بە تاوانی گەندەڵی گیراوە هەر پێوەندی بە ئەم خولە و جێگری یەكەمی سەركۆماری ئەو كاتی ئێرانەوە هەبووە. جگە لەوەش پەروەندەی حەمید بەقایی، یەكێكی دیكە لە جێگەرەكانی دەوڵەتی پێشووی ئێران لە لایی دەزگای قەزایی هەر وەك خۆی ماوەتەوە.