ئیبراهیم ڕەزاقی، مامۆستای زانكۆو كارناسی كاروباری ئابووریی ئێران دانی بە بوونی ٢٠ میلیۆن كەسی بێكارو ٣٠ میلیۆن هەژار داناوەو خوازیاری ئیستیزاحی كابینەی دەوڵەتی ڕووحانی لە لاسەن مەجلیس بووەو دەوڵەتی وریا كردۆتەوە كە دەبێ ئەوە بزانێ كە لەوانەیە ڕۆژێك هەر ئەم هەژارانە ڕۆژێك وەزاڵە بێنو بەرەوڕووی ببنەوە.
ئیبراهیم ڕەزاقی لە لێدوانێكدا بۆ هەواڵدەریی فارس سەر بە سپای پاسداران گوتی: ئەمڕۆ نزیكەی ١٥ تا ٢٠ میلیۆن كەس لە حەشیمەتی ئەم وڵاتە بێكارن بەڵام دەوڵەت بە شێوازی جۆراوجۆر نكۆڵی لە بوونی ئەم حەشیمەتە دەكا.
ناوبراو لە وڵامی ئەم پرسارەدا كە لەبەرچی دەوڵەت هیچ هەوڵێك بۆ پێك هێنانی كار و شوغڵ نادا؟ خوازیاری ئیستیزاحی كابینەی ڕووحانی بوو و گوتی: “دەوڵەت كە هیچ گوێی لەم بابەتە نییە، بەڵام كاتێك نوێنەرانی مەجلیس ئاگاداری كارەساتێكی لەم چەشنە دەبن پێویستە داوای ئیستیزاحی دەوڵەت بكەن، بەڵام ئەوانیش خۆیان لێ گێل كردووەو هەر باسی ناكەن.”
ئەم كاربەدەستە حكوومییە وێڕای ئاماژە بەم بابەتە كە یارانەی ٤٥ هەزار تمەنیی ئێستا ئیدی بایی ١٥ هەزار تمەنیش نابێ، گوتی: “سەدی ٧٠ی مووچەخۆرەكانی ئەم وڵاتە لە ژێر هێڵی هەژاریدا دەژین، ئەوە لە حاڵێك دایە كە ١١ میلیۆن لاو هەیە كە بەهۆی گرفتی ئابووری توانای پێكەوەنانی ژیانی هاوبەشیان نییەو ئەگەر كاریشیان هەبێ مووچەكەیان تەنیا بەرگەی ژیانی سەڵتیو كرێ خانووەكەیان دەگرێ.”
ناوبراو بە هێرش كردن بۆ سەر سیاسەتە ئابوورییەكانی دەوڵەتی ڕووحانی گوتی: “١٥ میلیۆن كەس بێكارن، ٦ میلیۆن كەس كڕێچینو ٣٠ میلیۆن كەسی دیكەش هەژار و نەدارن، بە هەر حاڵ دەبێ دەوڵەتیش ئەوە بزانێ كە لەوانەیە ڕۆژێك هەر ئەم هەژارانە وە زاڵە بێن و قۆڵی ڕووخاندنی لێ هەڵماڵن.”
