زیاتر لە ١٠ هەزار كۆچەر لە ماوەی ٢ ساڵدا لە دریادا خنكاون
ڕێكخراوی نەتەوە یەكگرتووەكان ڕۆژی سێشەممە ڕایگەیاند كە لە ماوەی دوو ساڵی ڕابردوودا زیاتر لە ١٠ هەزار كۆچەر لە ئاوەكانی دەریای مەدیترانەدا خنكاون.
ئادریەن ئێدواردز، وتەبێژی كۆمیساریای باڵای پەنابەرانی ڕێكخراوی نەتەوە یەكگرتووەكان لە ژنێڤ ڕایگەیاند كە دیاردەی كۆچ بەرەو ئورووپا بە شێوەی ناقانوونی‌و لە ڕێگەی دەریاوە لە حاڵی بەرزبوونەوە دایەو ته‌نیا له ماوه‌ی شه‌ش مانگی ڕابردوودا زیاتر لە ٢٨٠٠ كەس لەم ڕێگەیەدا خنکاون.
هاوكات دادگای باڵای یەكیەتیی ئورووپا لە لۆگزامبۆڕگ بڕیارێکی داوه كە به پێی ئه‌م بڕیاره هیچ كام لە وڵاتانی ئەندامی پەیمانی شینگێن بۆیان نییە كۆچبەرانی ناقانوونی كە سنووریان بەزاندوە، دەسبەسەر بكەن.
ڕێكخراوی نێودەوڵەتیی كۆچبەران، لە كۆتایی ساڵی ٢٠١٥دا ڕایگەیاند كە له‌و ساڵه‌دا زیاتر لە یەك میلیۆن كۆچبەر لە ڕۆژهەڵاتی نێوەڕاست و ئافریقاوە پێیان لە خاكی ئورووپا ناوە.
