وەزیری بێهداشت پاش سەفەری خۆی بۆ پیرانشارو دیدار لەگەڵ كچانی شیناوێ لە كاناڵی تێلێگرامی خۆیدا باسی لە بارودۆخی ئەم كچانە كردوە.
سەید حەسەن قازی زادە نووسیویەتی چاوی بە نادیە، موبینە، ئەسرین، شادی، سیما، ئارەزوو، فەریدە و كچانی دیكەی ڕووداوی ئاگركەوتنەوەکەی شیناوێ كەوتووە. بەو جۆرە كە قازی زادە دەڵێ ئەم كچانە داواكایەکی زۆریان نییە، ئەوان تەنیا دەیانەوێ بژین، وەك هەموو ئەم كچە شادو بەكەیفانەی كە هەموو ڕۆژێ دەچنە قوتابخانەو گەلێك هیواو خەیاڵی جۆراوجۆریان لە سەر دایە.
وەزیری بێهداشت لە درێژەدا نووسیویەتی بەداخەوە هەلە زێڕینەكان بۆ چارەسەری ئەم كچانە لەكیس چووە، چونكی ئەوان دەبوا دەسبەجێ پاش ئەم ڕووداوە تاڵە چارەسەر كرابان، بەڵام بە هەر هۆیەك بێ ئەم هەلە لە كیس چووەو جومگەی دەستی زۆربەیان لەكار كەوتوە.
حەسەن قازی زادە هیچ ئاماژەی بەوە نەكردوە كە هۆی فەوتاندنی ئەم هەلو دەرفەتە چی بووەو كام ناوەند و كام دام و دەزگای دەوڵەتی لەم بارەوە تاوانبارن و ئەم كیژۆڵە بێ تاوانانە باجی كەمتەرخەمیو نەزانکاریی چ كەسانێك دەدەنەوە.
ماوەیەك لەمەوبەر لە كاتی سەفەری ڕووحانی بۆ پارێزگای ورمێ باوكی یەكێك لە قوتابییە مەینەت چێشتووەكانی شیناوێ ڕەخنەی لە هاوكاری نەكردنی فەرمانداریی پیرانشار و پارێزگاری ورمێ گرت كە مۆڵەتێكی ١٠ خولەكیان پێ نەداون تا بتوانن چاویان بە ڕووحانی بكەوێو باسی كێشەو گرفتەكانیانی لەگەڵ بكەن.
جەلال مرادی، باوكی سیما گوتی بەداخەوە وادەو بەڵێنەكانی وەزیری بێهداشتو سەرۆكی ڕێكخراوی بەڕێوەبەرایەتی و پلان دانانی ئێران، سەبارەت بە پێدانی مووچەی ١ میلیۆن و ٢٠٠ هەزار تمەنی و خێرا كردنی ڕەوتی چارەسەری قوتابییانی شیناوێ نەهاتنە دی.