رۆژی ١٣ی جۆزەردانی ١٣٩٥ی هەتاوی سایتی “رجانیوز”ی سەر بە رێژیمی کۆماری ئیسلامی ئێران بە بڵاوکردنەوەی راپۆرتێک لە سەر روانگەو بۆچوونەکانی بەڕێز سکرتێری حیزبی دێموکراتی کوردستان، کاک خالید عەزیزی هەوڵی چەواشەکاری و پێکانی چەند ئامانجێکی پیلانگێڕانەی داوە.
“رجانیوز” بە چەواشەکردنی روانگەو خوێندنەوەکانی بەڕێز سکرتێری گشتیی حیزبی دێموکراتی کوردستان لە سەر شێوازو رەهەندەکانی خەباتی مافخوازانەی حیزبی دێموکرات و خەڵکی کوردستان دژ بە رێژیمی کۆماری ئیسلامی ئێران و، ناوهێنانی بەڕێز کاک مستەفا هیجری، سکرتێری حدکاو کۆمەڵە، هەوڵی پیلانگێڕی بۆ دووبەرەکی نانەوە دەدا.
لە راپۆرتەکەی “رجانیوز”دا وێڕای ریزکردنی کۆمەڵێک درۆ و دەسەلە و ئیدیعای بێ بنەما، هەوڵ دراوە بە زمان سکرتێری حیزبی دێموکراتی کوردستانەوە، پرسیار لە سەر خەباتی رەواو بەرحەقی چەکدارانەو پێشمەرگانەی حیزبی دێموکرات و خەڵکی کوردستان دژبە سیاسەتە دژی گەلییەکانی رێژیمی کۆماری ئیسلامی ساز بکات و هاوکات بە ناوهێنانی هەردوو بەڕێزان خالید عەزیزی و مستەفا هیجری، سکرتێرەکانی هەردوولای حیزبی دێموکرات، هەوڵی ناکۆکی نانەوەو دژایەتی سازکردنی لە نێوان ئەم دوو حیزبە دەدات.
ئەوە لە حالێک دایە کە هەر لە ماوەی چەند ساڵی رابردوودا حیزبی دێموکراتی کوردستان لە زمان بەڕێز سکرتێری گستی یەوە زۆر راشکلاوانەتر لە هەمیشە روانگەو بیروبۆچوونەکانی خۆی سەبارەت بە شێوازو رەهەندەکانی خەباتی حیزب و خەڵکی کوردستان دەربڕیوەو خەباتی پێشمەرگانەی وەک هەمیشە بە یەکێک لە شێوازە رەواکانی خۆی داناوە.
هەر لە ماوەی چەند ساڵی رابردوویش دا حزووری پێشمەرگە بۆ ناوخۆی وڵات و بوونیان لە نێو خەڵکی کوردستان و، تەنانەت شەهیدبوونی نزیک بە دە کەس لە باشترین رۆڵەکانی بە دەستی بەکرێگیراونی رێژیم، سەلمێنەری ئەو راستییەن کە حیزبی دێموکراتی کوردستان بە پێچەوانەی ئیدیعای پوچ و بێ بنەمای “رجانیوز” کە خەباتی پێشمەرگانە بە کارێکی “بێ سوود” دادەنێ، بوونی هێزی پێشمەرگەو چالاکیی پێشمەرگانە بە زەروورەتێکی بی ئەملاوئەولای خەباتی مافخوازانەی خەڵکی کوردستان و هێزە سیاسییەکانی دەزانێ.
ئەوەی ئاشکرایە رێژیمی کۆماری ئیسلامی لە ریگای “رجانیوز” و پێگەگانی دیکەیەوە بە بڵاوکردنەوەی وەها راپۆرتگەلێکی پڕ لە درۆ و دەلەسە چەند ئامانجی دیاریان هەیە کە پێویستە هێزە سیاسییەکانی رۆژهەڵاتی کوردستان و بەتایبەت ئەندامان و لایەنگرانی هەردوولای حیزبی دێموکرات لێی ئاگادار بن و هوشیارانە بەرەنگاری ببنەوە.
هەوڵدان بۆ قوڵترکردنەوەی ناکۆکی و جیاوازییەکانی نێوان هێزە سیاسییەکان، پیلانگێڕی دژ بە پرسی یەکگرتنەوەی دێموکراتەکان و ئاژاوە سازکردن لە نێوان ئەندامان و لایەنگرانی هەردوولای دێموکرات و خستە ژێر پرسیاری بەها و ئەرزشەکانی خەبات مافخوازانەی خەڵکی کوردستان و یەک لەوان خەباتی پڕ لە شانازیی پێشمەرگانەی حیزبی دێموکرات و هێزە سیاسییەکانی دیکەی کوردستان، ئەو ریزە ئامانجانەن کە رێژیم لە رێگای سایتی “رجانیوز” و ئەرتەشی سایبێری خۆیەوە پیلانیان بۆ دادەرێژێ.
بۆیە لیرەدا وێڕای وەدرۆ خستنەوەی سەرجەم ئەو درۆ و دەلەسەو ئیدیعایانەی کە “رەجانیوز” لە سەر بۆچوونەکانی بەڕێز خالید عەزیزی، سکرتێری گشتیی حیزب بڵاوی کردۆتەوە، داوا لە سەرجەم تێکۆشەرانی کورد لە رۆژهەڵاتی کوردستان بەتایبەت تێکۆشەرانی سەربە هێزو لایەنەکانی کوردستان دەکەین کە پێویستە زیاتر لە جاران یەکگرتوو بین و یەکگرتووانە دژ بە پیلانەکانی نەیارانمان هەڵوێست بگرین.
حیزبی دێموکراتی کوردستان
کۆمیسیونی راگەیاندن
١٥ی جۆزەردانی ١٣٩٥
