شیرین عیبادی، براوەی خەڵاتی نۆبێلی ئاشتیی ٢٠٠٣ بە بڵاوكردنەوەی ڕاگەیەندراوێك، بارودۆخی تەندرووستیی زیندانیی سیاسیی محەممەدسەدیق كەبوودوەند، دامەزرێنەری ڕێكخراوی بەرگری لە مافەكانی مرۆڤی نالەبار وەسف كردوەو داوای ئازادكرانی بێ ئەملا و ئەولای ناوبراوی کردوه.
شیرین عیبادی، هەروەها دەوڵەتی ئێرانی بە بەرپرسی گیانی كەبوودوەندو سهرجهم زیندانیانی سیاسی و عەقیدەتی زانیوە.
محەممەدسەدیق كەبوودوەند سەرەڕای توشبوون بە كۆمەڵە نەخۆشییەكی مهترسیدار، بۆ ناڕەزایەتی دەربڕین بە كرانەوەی پەروەندەی نوێ لەدژی لە ڕێكەوتی ١٩ی بانەمەڕەوە مانی لە خواردن گرتووە. بە قسەی پەریناز باغبان حەسەنی هاوسەری كەبوودوەند، ئەو لە زستانی ساڵی ڕابردووڕا 3 جار لە لایەن دادسەراوە بانگ كراوەو هەموو جارێ تۆمهتی نوێیان بەسەریدا ساغ كردۆتەوە.
شیرین عیبادی گوتوویەتی پەروەندەی نوێ بەدژی كەبوودوەند بە تۆمەتی “هەوڵدان بەدژی ئەمنیەتی میللی لە ڕێگەی كەین و بەین و كۆبوونەوە لە نێو زیندان” هاتۆتە ئاراوە تا لەم ڕێگەوە نەیهێڵن تەنانەت پاش كۆتایی حوكمی ناعادڵانەی پێشووش چاوی بە دەرەوەی زیندان بكەوێو بچێتەوە ناو كۆڕی هاوبیرەكانی خۆی.
لە لایەكی دیكەوە لەسەر بانگهێشتی ئەنجومەنی مافەكانی مرۆڤی كوردستان، ڕۆژی چوارشەممە ١٢ی جۆزەردان لە ژنێڤ، لەبەردەم مەقەڕی ڕێكخراوی نەتەوە یەكگرتووەكان لەم شارە بە مەبەستی ڕاكێشانی سەرنجی كۆمەڵگای نێودەوڵەتی بەرەو كەیسی كەبوودوەندو وەرگرتنی پشتگیریی ئەوان بۆ ئازاد كرانی ناوبراو و باقی زیندانییانی سیاسی و عەقیدەتی، كۆتایی هێنان بە هەر چەشنە ئەشكەنجە و توندوتیژییەك، دەستڕاگەیشتنی زیندانییان بە بێهداشت و هەڵوەشاندنەوەی سزای ئێعدام كۆبوونەوەیەك پێك هات.