شەڕ لە توركیە بۆتە هۆی ئاوارە بوونی ٣٣٠ هەزار كەس. دەوڵەتی توركیە دەڵێ بۆ نۆژەنكردنەوەی ئەم ناوچانەی كە تووشی خەسارو زیانی زۆر هاتوون بڕی ٣٤٠ میلیۆن دۆلار بوودجە پێویستە.
بەپێی ڕاپۆرتی سەرچاوە نێوخۆییەكانی توركیە، شەڕو پێکدادانه نێوخۆییەكانی ئەم وڵاتە كە زۆرتر لە ناوچەكانی باكووری كوردستان بووه، زیانی جیددی بە ٦ هەزار و ٣٢٠ خانوو و باڵهخانه گەیاندوە. هەروەها مزگەوتی مێژوویی “كورسونولو” لە ئامەد كە مێژووەكەی بۆ زیاتر لە ٥٠٠ ساڵ بەر لە ئێستا دەگەڕێتەوە، یەكێك لەم شوێنهواره مێژووییانەیە كە زیانێكی قەرەبوونەكراوهی بەر كەوتووە.
لە هاوینی ساڵی ڕابردوو بەم لاوە كە دانووستانەكانی ئاشتیی نێوان دەوڵەتی توركیەو هێزە كوردییەكانی ئەم وڵاتە گەیشته بۆنبهست، دهورێکی نوێی شەڕو پێكدادنەكان لهو وڵاته دەستی پێ كرد که به هۆی ئهوهوه زیاتر لە ٣٣٠ کهسی مەدەنی كوژراون. لەنێو قوربانیانی شەڕ و هێرشە نیزامییەكاندا ٧٨ منداڵیش بەدی دەكرێ.
ڕێكخراوی مافەكانی مرۆڤی توركیە كە لە ئامادە كردنی ئەم ڕاپۆرتەدا هاوكاری كردووە، ڕایگەیاندوە كە مافە سەرەتاییەكانی هاووڵاتیبوونی لانیكەم ١ میلیۆن و ٦٠٠ هەزار کهسی بێدیفاعی كورد لەم ماوەیەدا ژێر پێ نراوە.
ئەم ڕاپۆرتە هەروەها دهڵێ كە 335 هەزار هاووڵاتیی باکووری کوردستان لە هاوینی ساڵی ڕابردوو تا ئێستا ئاوارە و بێ ماڵو حاڵ بوون و بە ناچار شارو زێدی خۆیان بەجێ هێشتووە.
میر مێهمێت فورات، نوێنەری “پارتی دێمۆكراتیكی گەلان” كە لە حیزبە كوردییەكانی ئەم وڵاتەیە، دەڵێ لە هێندێك لە ناوچە مێژووییەكان، ئەرتەشی توركیە هەموو شتێكی فەوتاندووەو لەنێوی بردووە. ئهو دهڵێ دەوڵەت دەیهەوێ خۆیو خەڵكی ئەم وڵاتە فریو بدا و زۆر بە پەلە ئەم كارەساتەی كە دەیخوڵقێنن بە نۆژەنكردنەوەیەكی سەرسەری لە بەر چاوی بیروڕای گشتی بسڕنەوە.
ئەم نوێنەرەی كوردەكانی توركیە هەروەها گوتی: ئەگەر پێیان وایە بەم سووكە چاككردنەوانە دەتوانن دڵی خەڵكی كورد وەدەست بێنن، لە هەڵە دان. وێران بوونی شارە بچووكەكان و ناوچە مێژووییەكانی ئەم دەڤەرە، زیانێكی ڕەوانیی زۆر جیددی بە خەڵك گەیاندووە.
