سادق لاریجانی، سەرۆكی دەزگای قەزایی ئێران بۆ جارێكی دیكە گلەیی لە كەمیی قازیو نەبوونی سەرچاوەی ماڵیی پێویست بۆ پیڕاگەیشتن بە پەروەندە قەزاییەکان کرد.
ئەو لەگەڵ ئەوەشدا دانی بەوە دانا كە لە كاتی دیاریكرانی وەك سەرۆكی دەزگای قەزایی لە ساڵی ٨٩ ڕا تا ئێتستا زیاتر لە ٤ هەزار قازیی دیکەی لە دەزگای قەزایی ئەم وڵاتەدا دامەزراندوە.
سادق لاریجانی لە بەشێكی دیكەی قسەكانیدا گوتی لە هێندێك شوعبەكانی دەزگای قەزایی، قازییەك لە مانگدا بە ٢٥٠ پەروەندە ڕادەگاو ئەم مەسەلەش نەتەنیا دەبێتە هۆی كەڵەكە بوونی پەروەندەكان لەسەر یەكتر، بەڵكوو كاتەكانی چاوپێداخشاندنەوە بەم پەروەندانەش وەدوا دەخا.
سەرۆكی دەزگای قەزایی بۆ جارێكی دیكە پێی لەوە نا کە ساڵانە ١٥ میلیۆن پەروەندە لە دەزگای قەزایی ئێران پێك دێن. ناوبراو ئەم كۆمەڵە پەروەندەیەی وەك “خزمەت گوزارییەكان”ی دەزگای قەزایی ناو بردوەو گوتوویەتی بە قسەی سەرۆكی ڕێكخراوی سەبتی ئەسنادی ئێران، نزیكەی ٤٠ میلیۆن پەروەندە لەم بەناو خزمەتگوزارییانەدا تۆمار كراون.
سەرۆكی دەزگای قەزایی پاشان گوتی عەجالەتەن بۆ دابینكردنی سەرچاوە ماڵییەكانی دەزگای قەزایی ئەم وڵاتە، پێویستی بە ١٠٠ میلیارد تمەن پارە هەیە.
