محەممەدجەواد زەریف وەزیری دەرەوەی ئێران لە سەفەری خۆی بۆ لەهێستان هیوای خواستوە كە ئاستی مامەڵە تیجارییەكانی ئەم دوو وڵاتە لە ٧٠ میلیۆن دۆلاری ئێستا بۆ ١ میلیارد دۆلار بەرز بێتەوە.
محەممەدجەواد زەریف پشتڕاستی كردەوە كە ئاستی ساتو سەودا تیجارییەكانی ئێران لەگەڵ لەهێستانو وڵاتەكانی دیكەی ئورووپای ڕۆژهەڵات شتێكی ئەوتۆ و بەرچاو نییە، ئەگەرچی بارستاییەكانی لەهێستان وەك ئەندامی یەكیەتیی ئورووپا بۆ گەشەی پێوەندییە ئابوورییەكان لەگەڵ ئێران لە ئاستێكی بەرز دایە.
زەریف لە جێیەكی دیكەی قسەكانیدا پێداگری كردەوە كە سەرەڕای ڕێككەوتنی ئەتۆمی، هێندێك لە وڵاتە ڕۆژاواییەكان بە تایبەت ئامریكا لە جێبەجێكردنی بەڵێنییەكانیان بە نیسبەت ئێران سوور نین، بە جۆرێك كە ئاسەوارە زەینییەكانی گەمارۆ ماڵییەكانی ئورووپا لە بەرامبەر كۆماری ئیسلامی هەر وەك خۆی ماوەتەوە.
وەزیری دەرەوەی كۆماری ئیسلامی لە بەشێكی دیكەی قسەكانیدا گوتی: هەرچەند پێوەندییە ماڵییەكانی ئێران لەگەڵ نیزامی بانكیی جیهانی دەستی پێکردۆتەوە، بەڵام ئەم كێشانە پێوەندییان بە قانوونەكانی بانكییەوە هەیە كە لە دەورانی گەمارۆكان بەدژی كۆماری ئیسلامی هاتنە ئاراوە، كاریگەریی ئەم گەمارۆیانە تا ئێستاش ڕێگری لە هاوكاری كردنی ئاسایی ئێران و بانكە ئورووپاییەكان دەكەن.
زەریف ئەم گرفتانەی وەك ” ترس و خۆف” ناو بردوە كە ئاكامی گەمارۆ یەكلایەنەكانی ئامریكایە. ئەو هەروەها گوتوویەتی سزا ماڵییە قورسەكانی ئامریكا بەدژی بانكە ئورووپاییەكان كە لە ڕابردوودا هاوكاریی ئێرانیان كردووە، بوونەتە هۆی ئەوەی كە بانك و ناوەندە ئابوورییەكانی ئورووپا بەهۆی ترسو نیگەرانیی خۆیان لە ئامریكا، لە هەر چەشنە هاوكاری كردنێك لەگەڵ ئێران بسڵەمێنەوە.
زەریف هەروەها دانی بەوە دانا كە ئێستا كۆماری ئیسلامیی ئێران لەم بەشەدا كە پێوەندی بە مەسەلە بانكییەكانەوە هەیە زۆر لە دوایە و قەیران و قەرز و قۆڵە ماڵییەكان لە ئێران لە ماوەی ساڵانی ڕابردوودا لە سەر یەكتر كەڵكە بوون.