توركیە مۆسكۆی بە ناردنی چەكوچۆڵ بۆ پ ک ک تاوانبار کرد

ڕەجەب تەیب ئەردۆغان، سەركۆماری توركیە، مۆسكۆی بە ناردنی چەكوچۆڵ بۆ حیزبی كرێكارانی كوردستان تاوانبار كرد.
بەپێی ڕاپۆرتی ڕاگەیەنەكانی توركیە، ڕەجەب تەیب ئەردۆغان لە سەفەری یەك ڕۆژەی خۆی بۆ شاری ئامەد لە باكووری كوردستان گوتی ڕووسیە لە ڕێگەی عێراق‌و سووریەوە مووشەك و چەكی دژە ئاسمانیی بۆ پ ک ک دەنێرێ.
پێش ئەمەش توركیە، مۆسكۆی بە پشتیوانیكردن لە كوردانی ڕۆژئاوا تاوانبار كردبوو، بەڵام ئەمە یەكەم جارە كە ئەردۆغان، ڕووسیە تۆمەتبار بە یارمەتیدانی کوردەکانی باکووری کوردستان دەکا.
پێوەندییەکانی نێوان مۆسكۆ و ئانكارا بەدوای هاتنی ئەرتەشی ڕووسیە بۆ شەڕی نێوخۆیی سووریەو بەردانەوەی فڕۆكەیەكی ڕووسی لە لایەن توركیەوە گرژیی تێکەوت‌و ئێستا مۆسكۆ گەمارۆی خستۆتە سەر ئانكارا.
لە حاڵێكدا كە سەركۆماری توركیە، مۆسكۆ بە پشتیوانی سەرەكیی حزبی كرێكارانی كوردستان تاوانبار دەكا كە نۆمان كورتولمۆش، وتەبێژی دەوڵەتی ڕۆژی دووشەممە گوتی، پێوەندیی نێوان ئەم دوو وڵاتە لە ماوەیەكی كەم‌دا هێور دەبێتەوە. ناوبراو پێداگریی كردەوە كە ئەم دوو وڵاتە گیروگرفتی ئوتۆیان نییە كە چارەسەر نەكرێ‌و هیوای خواست كە كێشەی نێوان ئەم دوو لایەنە بە دانیشتن و گفتۆگۆ چارەسەر بكرێ.