سەرەڕای تێپەڕینی زیاتر لە مانگێك بە سەر دەستبەسەر كرانی ئەفسانە بایهزیدی، تا ئێستاش هیچ ئۆرگانێكو ناوهندێکی دهوڵهتیو ئهمنیهتی بەرپرسایەتیی گیرانو ڕاگرتنی ناوبراوی وه ئەستۆ نەگرتووە.
ئەفسانە بایهزیدی ڕۆژی ٥ بانەمەڕو شاهۆی براشی ڕۆژی ٩ی بانەمەڕ لە لایەن مەئموورە ئەمنیەتییەكانی وەزارەتی ئیتلاعاتەوە دەستبەسەر كران. ئەم هێزانە لە كاتی دەستبەسەركرانی ئەو خوشكو برایەدا هیچ حوكمو بهڵگهیهکی دهزگای قهزایییان پێنەبووەو سەبارەت بە هۆكارەكانی گرتنی ئەوان هیچ ڕوونكردنەوەیەكیان نەداوە.
دایكی ئەم دوو چالاکه كوردەی خەڵكی شاری بۆكان دهڵێ كوڕەكەی ئازاد كراوە، بەڵام نیگەرانیی قووڵی خۆی سەبارەت بە چارەنووسی ناڕوونی كچەكەی دەربڕیوە.
دایكی ئەفسانە بایزیدی لە لێدوانێكدا بۆ كۆمهڵهی چالاكانی مافەكانی مرۆڤ گوتی هێزە ئەمنیەتییەكان لە كاتی دەستبەسەركردنی ئەفسانەدا، خۆیان لە بێ ڕێزی كردن بە ئەویش بە ٦٢ ساڵ تەمەنەوە نەپاراستووە.
خانمی دەروێشی لە درێژەی ئەم لێدوانەدا سەبارەت بە بارودۆخی كچەكەی دەڵێ شەوو ڕۆژ بە شوێنیدا دەگەڕێم، لە بۆكان ڕا تا مەهابادو ورمێو، تەنانەت چوومەتە تارانیش، بەڵام هیچ كاربەدەستێك نایهەوێ وڵامی ڕاستم پێ بداو پێم بڵێ كچەكەم لە كوێیە، تەنیا ئەوەندە دەڵێن كە ئێمە نازانین كچەكەت لە كوێیهو لای ئێمە نییە، بەڵام ئهمن دڵنیام ئەم مەئموورانەی كە كچەكەمیان دەستبەسەر كرد لە لایەن ئیتلاعاتەوە هاتبوون، چونكی یەكێك لەوانم دەناسی كە پێشتریش بە شوێن كچەكەمدا دەگەڕا.
ئەم دایكە داماوە دەڵێ ئێستا ئهمن نازانم ئەفسانە مردووە یان زیندوویە، بۆ كوێیان بردووەو لەبەرچی هیچ كاربەدەستێك وڵامی من ناداتەوە كە دایكی ئەم كچەم، شەو و ڕۆژ كارم بۆتە شینو گریانو فرمێسك ڕشتن بە جۆرێك كە خەریكە كوێر دەبمو چاوەكانم لە دەست دەدەم.
شایانی باسە ئەفسانە بایزیدی پێشتریش لە ساڵەكانی ٩٢، ٩٣و ٩٤ بە تۆمەتی هاوكاری كردنی حیزبە كوردییەكانی دژبەری ڕێژیم دەستبەسەر كرابوو و هەموو جارێ چەندین مانگ لە زیندان لە ژێر ئەشكەنجەو ئازاردا بووەو ساڵی ڕابردووش لە لقی ١ی دادگای ئینقلاب لە مەهاباد حوكمی 2 ساڵ زیندانی تەعلیقیی بەسەردا سەپێندرابوو.