وتەبێژی وەزارەتی دەرەوەی كۆماری ئیسلامیی ئێران وێڕای ڕەخنەگرتن لە قسەكانی ئەم دواییانەی عادڵ جوبەیر وەزیری دەرەوەی عەرەبستان، ئەم وڵاتەی بە ناسەقامگیریی لە عێراق، ناوچەو جیهان‌و؛ بەپشتیوانیی سەرەكیی لە تیرۆریزم ناوبرد.
عادڵ جوبەیر لەم دواییانەدا لە وتووێژێكدا بە تلویزیۆنی “ڕاشا تو دەی” گوتبوو كە بوونی قاسم سلێمانی لە عێراق بە باش نازانین‌و هەروەها ئاماژەی بە ئەوەش كردبوو كە هێزەكانی قودسی سپای پاسداران لەگەڵ خەڵكی عێراق‌و سووریە شەڕ دەكەن‌و هێز تیرۆریستەكانی تارانی بەوە تاوانبار كرد كە لە هەموو جیهان خەریكی عەمەلیاتی تێكدەرانەن.
لەكاردانەوە بەم قسانە، حوسێن جابری ئەنساری، ڕۆژی هەینی گوتی بوونی ڕاوێژكارانی نیزامی بە فەرماندیی قاسم سلێمانی لە عێراق لەسەر داوای ئەم وڵاتەیە.
شەڕە قسەی ئێران‌و عەرەبستان لە ماوەی چەند مانگی ڕابردوودا بە شێوەیەكی بەرچاو زیادی کردوەو جیا لە دژایەتیی بەرژوەندییەکانیان، پەلاماری هێزە ئەمنیەتییەکان لە تاران‌و مەشهەد بۆ ناوەندە دیپلۆماتیکەکانی عەرەبستان کاریگەریی زۆری لەسەر ئەو ئاڵۆزییانەی نێوان دوو دەوڵەت بووە.
