پاسەوانانی سنووری لە ناوچەی سەڵماس بە تەقەی ڕاستەوخۆ كۆڵبەرێكیان كوشتو ٤ كەسی دیكەش بریندار كرد.
ڕۆژی 22ی بانەمەڕ هێزەكانی سپای پاسداران لە سەڵماس تەقەیان لە گەرمان ئەمینی، كوڕی وەحدەت تەمەن ٣٦ ساڵ، خەڵكی گوندی دشوانی سەربە شاری سەڵماس لەگەڵ برایەكەی بە ناوی ڕەحیم ئەمینی تەمەن ٣٣ ساڵ، كەریم ئەتمانی كوڕی فەرزامی تەمەن ٣٨ ساڵ، كوهزاد ئەتمانی كوڕی ئەفروز تەمەن ٢٦ ساڵ و سەمەد گوڵ محەممەدی كوڕی عەلی كرد.
بەدوای تەقەی ڕاستەوخۆی هێزەكانی ڕێژیم گەرمان ئەمینی لە جێدا گیانی لەدەست دا،و ٤ كەسەكەی دیكەش بە توندی بریندار بوونو بۆ نەخۆشخانەی سەڵماس گوازرانەوە، بەڵام تا ئامادەكرانی ئەم هەواڵە دەگوترێ کە حاڵیان زۆر باش نییە.
گەرمان ئەمینی، سەرپەرستی بنەماڵەیەو خاوەنی ٣ منداڵەو پاش چەندین جار بەدواداچوونی بنەماڵەکەی بۆ وەرگرتنەوەی تەرمی گەرمان، هێزە ئەمنیەتییەكانو سپای پاسداران ئامادە نەبوون تەرمەکەیان بدەنەوە
شایانی باسە كە كۆڵبەران، خەڵكی سەر سنوورەكانن كە بە دەیان كیلۆمیتر بە كەلوپەلەوە لە ناوچە شاخاوییەكان بە مەبەستی بەدەستهێنانی پارویەك نان بۆ ماڵو منداڵەكانیان دەبڕن. هێزەكانی كۆماری ئیسلامیش هەر جارناجارێك هەڵدەكوتنە سەریانو دەیاندەنە بەر دەستڕێژی چەکەکانیانو یان بە شێوەیەكی دیكە ئەوەندەیان فشار بۆ دێنن كە دەكەونە شوێنە مێنڕێژكراوەكان تا دوایین ساتەكانی ژیانیان نەقوستان دەبن.