بەردەوامیی فەوتانی شوێنەوارە مێژووییەكان لە ئیلام

شوێنەواری مێژوویی چورە لە پارێزگای ئیلام لە بەرەبەری فەوتان دایە.
بەپێی ڕاپۆرتی ماف نیوز، شوێنەواری مێژوویی چورەی لە شاری ئابدانان، سەرەڕای پێڕانەگەیشتن‌و نۆژەننەكردنەوە، هێندێك كەس بە شەو و چەندین جار ئەم شوێنەیان داوەتەوە بە گشتی سیماكەیان شێواندوە بە شێوەیەك كە ناناسرێتەوە.
بەپێی هەمان سەرچاوە پاش هەڵكەندن‌و دانەوەی ئەم شوێنەوارە، چەند جار لەلایەن خەڵکەوە سکاڵا بۆ ناوەندە پێوەندیدارەکان بەرز كراوەتەوە، بەڵام بەرپرسانی پێوەندیدار تا ئێستاش لەگەڵ بێ هیچ كەس‌و لایەنێكیان دەسبەسەر نەكردوە.
لە لایەكی دیكەوە بە هۆی ئاستەمبوونی ناوچە‌و نەبوونی جادە پاراستنی ئەم شوێنانە زۆر سەختە.
پێشتر میراتی فەرهەنگیی ئابدانان ڕایگەیاندبوو كە بەڕێوەبەرانی ڕێكخراوی میراتی فەرهەنگیی ئێران بەڵێنیی دابوو بۆ پاراستنی ئەم شوێنەوارە مێژوویانە ئامێرو ماشێنی شیاو و تایبەت بەم جۆرە شوێنانە تەرخان بكا بەڵام ئەویش تەنیا چەند قسەیەك بوون و جێبەجێش نەكرا.
شوێنەواری مێژوویی چورە لە ساڵی ١٣٩٠ لە لایەن میراتی فەرهەنگی لە لیستی شوێنەوارە میللییەكانی ئێران تۆمار كرا.
شاری باستانی و مێژوویی چورە لە شوێنەوارە مێژووی‌و كەونارییەكانی ئەم پارێزگایەیە كە لە ٤٠ كیلۆمیتریی شاری ئابدانان‌و لە تەنیشت دۆڵی “كول ئەمار” لە ناوچە ساردو شارخاوییەكانی دیناركێو هەڵكەوتوە.
ئەم شارە مێژووەکەی بۆ سەردەمی ئەشكان‌و ساسانییەكان دەگەڕێتەوەو مێژووناسان دەڵێن تەمەنی ئەم شارە زیاتر لە هەزارو ٥٠٠ ساڵە.