هێزەكانی سەر بە بەسیج لە ناوچەی مەرگەوەڕی ورمێ تەقەیان لە كۆڵبەرانی كورد كرد.
بەپێی هەواڵی گەیشتوو بە کوردستانو کورد ڕۆژی ڕابردوو كۆمەڵێك لە كۆڵبەرانی كورد لە نێوان ئاواییەکانی “شێخ زەرد”و “چریكاوا”ی ناوچەی مەرگەوەڕی ورمێ لە لایەن هێزەكانی بەسیجەوە تەقەیان لێ دەكرێ. لەو دەسترێژەدا سێ ئەسپی کاروانچییەکان دەکوژرێ.
هەروەها لە لایەكی دیكەش هێزە چەكدارەكانی كۆماری ئیسلامی شەوی ڕابردوو لە سنووری نێوان ئێرانو عێراق كەمین بۆ كۆڵبەرانی دادەنێنەوەو لە ئاكامدا پۆلێک لەوان دەسبەسەر دەكەن.
ئەم كۆڵبەرانی خەڵكی ئاوایی دزلێی هەورامان بوون كە لە لایەن هێزەكانی سپای پاسدارانەوە لە سەر سنووری ملەخوردی دەسبەسەر كران.
جێی بیرهێنانەوەیە لە ماوەی چەند ڕۆژی ڕابردوودا كۆڵبەرێك بە ناوی ڕەحمان سەعیدی خەڵكی ئاوایی دویسەی سەرشیوی مەریوان لە سنووری نەوسوود لە ناوچەی پاوە هێرش دەكرێتە سەریو دەیکوژن.
لە سنووری سەردەشت و بانەش هێزە ئەمنیەتییەكان لە حاڵی ئامادەباشیدان و هاتوچۆی كۆڵبەرانیان سەخت كردوە و هەروەها لە ناوچەی بەیتووشی سەردەشت و سنوورەكانی بانە دەستیان بەسەر باری كاسبكاران و كۆڵبەران داگرتووە.
