کومیتەی ناوەندیی کۆمەڵەی زەحمەتکێشانی کوردستان لە پەیامێکدا یەکگرتنەوەی ڕیزەکانی حیزبی دێموکراتی پیرۆزبایی کردووە و هیوای خواستووە کە ئەم یەکگرتنەوەیە ببێتە مایەی تەبایی لەنێوان لایەنە سیاسییەکانی کوردستان و گەشەی زیاتری ناوەندی هاوکاریی حیزبەکانی کوردستانی ئێران.
دەقی پەیامەکە بەم چەشنەیە:
بەڕێزان کاک مستەفای هیجری لێپرسراوی گشتی و بەڕێزان ڕێبەرایەتیی کاتیی حیزبی دێموکراتی کوردستانی ئێران!
لەگەڵ سڵاو و ڕێز
بە خۆشحاڵییەوە کە پرۆسەی دیالۆگی نێوان هەرتک باڵی حیزبی دێموکرات سەرنجام پاش بڕینی قۆناغێکی پڕ گفتوگۆ و چڕوپڕ لەپێناو یەکخستنەوەی ڕیزەکانی حیزبی دێموکراتی کوردستان و حیزبی دێموکراتی کوردستانی ئێران، هەنگاوەکانی یەکگرتنەوە و وەسەریەکخستنەوەی ئەو حیزبە گەیشتە دواقۆناغی خۆی.
وێڕای پیرۆزبایی لە ڕێبەرایەتی و ڕیزەکانی ھەرتک لایەنی حیزبی دێموکرات بۆ سەرخستنی ئەو ھەنگاوە، بێگومان ئەم یەکگرتنەوە و یەکڕیزییەی ئێوە دڵخۆشکەرە بۆ ئێمەی دۆست و هاوپەیمانیش لە بزووتنەوەی کوردستان وهەمیش بۆ دۆست و ئەندامان و لایەنگرانی حیزبی دێموکرات لە هەموو کوردستان. هیوادارین پرۆسەی یەکگرتنەوەی حیزبەکەتان ببێتە مایەی تەبایی و یەکڕیزی و هاوخەباتیی زیاتر لەنێو حیزب و لایەنە سیاسییەکانی کوردستان و هەروەها ببێتە هەوێنی برەودان و گەشەی زیاتری ناوەندی هاوکاریی حیزبەکانی کوردستانی ئێران لەپێناو وەدیهێنانی ئاوات و ئامانجی گەلەکەمان لە کوردستانی ڕۆژهەڵات.
لە کۆتاییدا وێڕای پیرۆزبایی دووبارەمان، پڕ بەدڵ هیوای سەرکەوتنتان بۆ دەخوازین.
کومیتەی ناوەندی کۆمەڵەی زەحمەتکێشانی کوردستان
١ی خەرمانانی ١٤٠١ی هەتاوی
٢٣ی ئاگۆستی ٢٠٢٢ی زایینی
