دروستکردنی پەروەندە بۆ ٧به‌ندیی سیاسی له‌ زیندانی ئیتلاعاتی كامیاران

ڕۆژی ڕابردوو ٣ لاوی خەڵكی شاری كامیاران كە لە لایەن ئیدارەی ئیتلاعاتەوە بانگ كرابوون، هەروەها ٤ لاوی دیكەی خەڵكی ئەم شارەش پاش دەستبەسەر كرانیان بۆ زیندانی ئیدارەی ئیتلاعاتی ئەم شارە گوازرانەوە تا لە بابەت بەڕێوەبردنی ڕێوڕەسمی ڕۆژی كرێكار پەروەندەیان بۆ تەكمیل بكەن.
ڕۆژی دووشەممە ٣ی جۆزەردان، ٣ که‌سی خه‌ڵکی كامیاران بە ناوەكانی ڕۆژین ئیبراهیمی، شۆعلە گودەرزی‌و دڵنیا سەبووری كە پێشتر لە لایەن ئیداره‌ی ئیتلاعاتەوە بانگ كرابوون، سەردانی ئەم ئیدارەیان كرد.
دەگوترێ ئەم ٣ که‌سه‌ پاش لێكۆڵینەوە لە بابەت بەشداری كردن لە ڕێوڕەسمی ڕۆژی كرێكاردا، لە لایەن مەئموورەكانی ئیدارەی ئیتلاعاتەوە بێ‌ڕێزییان پێ كراوەو بە هەڕەشەو تۆقاندن ناچاریان كردوون بەڵێننامە ئیمزا بكەن كە چی دیكە بەشداری ڕێوڕەسمی لەم چەشنە نەبن.
لە لایەكی دیكەشەوە ٤ كەسی دیكەی خەڵكی ئەم شارە بە ناوەكانی: ئارام محەممەدی، شاهۆ سادقی، ئومید ئەحمەدی و مێهرداد سەبووری، كە لە ڕۆژی پێنجشەممە ٣٠ بانەمەڕەوە دەستبەسەرو لە زیندانی ئیدارەی ئیتلاعاتی سنە بەند كراون، هاوكات بە مەبەستی بەرەوڕوو بوونەوەو تەكمیلكرانی پەروەندەكانیان، بۆ ئیدارەی ئیتلاعات گواسترانەوە.
شایانی باسە شۆعلە گوودەرزی‌و ڕۆژین ئیبراهیمی هەر لەم پێوەندییەدا ڕۆژی شەممە ١ی جۆزەردان لە لایەن ئیدارەی ئیتلاعاتی شاری كامیارانەوە بانگ كرابوون‌و لێكۆڵینەوەیان لێ كرابوو.
دەگوترێ هێزەكانی سەر بە وەزارەتی ئیتلاعات بەیانیی ڕۆژی ٣٠ بانەمەڕ لە شاری كامیاران بە جیاجیا هەڵیانكوتابووە سەر ماڵی ئارام محەممەدی، شاهۆ سادقی، ئومید ئەحمەدی و مێهرداد سەبووری و پاش دەستبەسەر كردنیان ڕاپێچی گرتنگەی ئیدارەی ئیتلاعاتی سنەیان كردبوون.
جێی وەبیر هێنانەوەیە لە نێو ئەم كەسانەدا مێهرداد سەبووری پێشتریش بەهۆی چالاكی كردن لە بواری مافەكانی كرێكاران بۆ ماوەیەك بەند كرابوو.