لە ڕەوتی سەفەری سەرۆك وەزیری هیند بۆ تاران و پاش دیدار و چاوپێكەوتنی ناوبراو لەگەڵ حەسەن ڕووحانی سەركۆماری ئێران، ١٢ بەڵگەنامەی هاوكاری لە نێوان ئەم ٢ وڵاتەدا ئیمزا كرا.
نارندرا مودی، سەرۆك وەزیری هیند ڕۆژی یەكشەممە ٢ی جۆزەردان گەیشتە شاری تاران پێتەختی ئێران و بەیانیی ڕۆژی دووشەممە لە كۆشكی سەعدئاباد لە لایەن حەسەن ڕووحانی سەركۆماری ئێرانەوە بە ڕەسمی پێشوازی لێ كرا.
لە دیداری نێوان سەرۆك وەزیری هیند لەگەڵ سەركۆماری ئێران ١٢ بەڵگەنامەی ڕێككەوتن و هاوكاریی دوولایەنە ئیمزا كرا. ئەم بەڵگەنامانە لە بوارە جۆربەجۆرەكان وەك لێكۆڵینەوە و تێكنۆلۆژییەكان، هاوكارییە فەرهەنگییەكان و هەروەها لە بواری ئابووری، پێوەندیی دوو لایەنەی نێوان ئێران و هیند بەهێز دەكەن.
پەرەپێدانی بەندەری چابەهار لە گرێبەستێكی دوو لایەنەی نێوان ڕێكخراوی بەندەرەكان و پاپۆڕەوانیی ئێرانو شیركەتێكی هیندیدا، هەروەها نووسینی ڕێككەوتنامەی هاوكاریی لە نێوان ڕێكخراوی بەندەرەكان و پاپۆڕەوانیی ئێران و “اگزیم”بانكی هیند بە مەبەستی دیاری كردنی بارودۆخی ئێستای هێڵی ئیعتباریی بەندەری چابەهار كۆمەڵە ڕێككەوتنامەیەكی دیكە بوون كە لە نێوان ئێران و هیندوستان ئیمزا كران.
لە ماوەی چەند ساڵی ڕابردوودا و بە چڕ بوونەوەی گەمارۆ نێودەوڵەتییەكان بەدژی ئێران، پێوەندییەكانی نێوان ئێران و هیندیش سارد و سڕ ببوو. بە تایبەت لە ساڵی ٢٠٠٩ پاش ئەوەی كە هیند لە ئاژانسی نێودەوڵەتیی وزەی ئەتۆمی بە زەرەری ئێران دەنگی دا، پێوەندیی نێوان ئەم دوو وڵاتە ئاڵۆزتر بوو.
پاش ئیمزاکردنی ڕێككەوتنامەی ناوكی، هەر دوو وڵاتی هیند و ئێران لە هەوڵی باشتر كردنی پێوەندییەكانیان لەگەڵ یەكتر دان. دەگوترێ پرۆژەی پەرەپێدانی بەندەری چابەهار یەكێك لە گەورەترین پرۆژەكانی هاوكاریی نێوان ئێران و هیند دەبێ. دەوڵەتی هیندووستان بۆ وەڕێ خستنی ئەم پرۆژەیە نزیكەی ٥٠٠ میلیۆن دۆلار خەرج دەكا.