بەدوای كاردانەوەی بەربڵاو بە ئاشکرابوونی مووچە دەیان میلیۆنییەكانی بەڕێوەبەرانی بیمەی ناوەندیدا، ئەم جارەیان قایممەقامی نیزامی پەرستاری ڕەخنەی لە دابەشكرانی داهاتەكان لە وەزارەتی بێهداشت گرتوەو دهڵێ كە هێندێك كەس لەم وەزارەتخانەیەدا مانگانە مووچەی ٢٠٠ تا ٤٠٠ میلیۆن تمەنی وەردەگرن.
محەممەدشەریف موقەدەم، جێگری ئەم ڕێكخراوە، ڕۆژی هەینیی ٣١ی بانەمەڕ، لە لێدوانێكدا بۆ هەواڵدەریی كاری ئێران، ڕایگەیاند كە لە وەزارەتی بێهداشت فیشە دەیان میلیۆن تمەنییەكانی مووچە شتێكی زۆر ئاساییەو هەر ئەم بابهتهش به هۆكاری سەرەكیی كەمیی سەرچاوە ماڵییەكانی ئەم وەزارەتخانەیە دادهنرێ.
ناوبراو لە درێژەدا گوتی گرووپەكانی جەراحی لە وەزارەتی بێهداشت بەهەموو پسپۆڕییەكانەوە وەك ئۆرتۆپێدی، مێشكو ئەعساب، دڵ و ئۆرۆلۆژی، زۆربەیان فیشی مووچەی ٧٠ تا ٩٠ میلیۆن تمەنییان هەیە، دیارە لەم وەزارەتخانەیە كەسانێكی دیكەش هەن كە فیشی چهند سهد میلیۆن تمەنییان هەیەو تەنانەت مانگانە ٢٠٠ تا ٤٠٠ میلیۆن تمەن وەردەگرن.
موقەدەم لە كۆتایی قسەكانیدا گوتی: ئەم مووچە سەد میلیۆنییانە لە وەزارەتی بێهداشتدا هیچ پاساوێك هەڵناگرنو بۆ وەی نابن هیچ بیانوویەكیان بۆ ببیننەوە، چونكی لە هێندێك حاڵەتدا پزیشك تەنانەت لە نەخۆشخانەش نییەو پهرهستارو یارمەتیدەرەكانی ئەركو كارەكانی بۆ ڕادەپەڕێننو تەنیا بەهۆی كەڵكوەرگرتن لە مۆری پزیشك ئەم پووڵە زۆرە دەڕژێتە نێو گیرفانی پزیشكەوە.
مەسەلەی فیشە دەیان میلیۆنییەكانی مووچە لە بیمەی ناوەندیی ئێران تا ئێستا دەست لە كار كێشانەوەی محەممەدئیبراهیم ئەمین، سەرۆكی ئەم ڕێكخراوەی لێ كەوتۆتەوە.
ئەم فیشانە كە بۆ یەكەم جار لە تۆڕە كۆمەڵایەتییەكان لە هەڵڵا دران، ئهوه دهسهلمێنن که مانگی ڕەشەممەی ساڵی ڕابردوو 3 بەڕێوەبەری پلەبەرزی بیمەی ناوەندیی ئێران، سەرجەم ١٨٠ میلیۆن تمەنیان مووچە وەرگرتووە كە تەنیا یەك كەس لەوان بڕی ٨٧ میلۆن تمەنی دراوهتێ.
