حوكمی ئێعدامی ٦ كەس لە زیندانی ورمێ و ٦ دیكەش لە زیندانی یەزد جێبەجێ كرا.
بەپێی قسەی كاربەدەستانی دەزگای قەزایی ٨ كەس لەم ١٢ كەسە بە تۆمەتی قاچاخكردنی مادەی هۆشبەر ئێعدام كراون.
ناجی كەیوان، نادر محەممەدی، عەلی شموگردیان، فەرەیدون ڕەشیدی و حەیدەر ئەمینی، ٥ كەس لەم ئێعدامكراوانەی بەندیخانەی ورمێ كوردن و خەڵكی شارەكان ورمێ و سەڵماسن كە كاربەدەستانی زیندانی دەڵێن بە تۆمەتی مادەی هۆشبەر ئێعدام كراون، بەڵام لە بابەت پەروەندەی ئەم چەند كەسە تا ئێستا هیچ شتێك بڵاونەكراوەتەوە.
دەزگای قەزایی كۆماری ئیسلامیی ئێران پێشینەی ئەوەی هەیە كە چالاكانی سیاسی بە تۆمەتی قاچاخكردنی مادەی هۆشبەر ئێعدام بكا.
دادستانی گشتیو شۆڕشی یەزدیش ڕایانگەیاند كە 3 بەندكراوی بە تۆمەتی قاچاخكردنی مادەی هۆشبەر، كەسێكی دیكە بە تۆمەتی دزیكردن و دووی دیكەش بە تۆمەتی پێوەندیی نامەشروع ملیان بە پەتەوە كرا.
ڕێكخراوی لێبوردنی نێودەوڵەتی لە ڕاپۆرتێكدا ڕایگەیاند كە لە ماوەی یەك ساڵی ڕابردوودا 797 كەس لە ئێران ئێعدام كراون كە لەم ڕێژەیە ٤٩ كەسیان لەبەر چاوی خەڵك ملیان بەدارەوە كردوون.
پێویست بە وەبیرهێنانەوەیە كە كۆماری ئیسلامی پێشینەی دیكەشی هەیەو لە ساڵی ٢٠١٤ش ٧٤٣ كەسی ئێعدام كردوە.
