سەرۆكی ڕێكخراوی نیزامی دەروونناسیی ئێران بێكاریی بە یەكێك لە مەسەلە گرینگەكانی تێكچوونی دەروونی و خەمۆكیی كۆمەڵگە زانی.
عەباس عەلی ئەڵڵایاری، سەرۆكی نیزامی دەروونناسی و نوێنەری خولی شەشەمی مەجلیسی ئێران گوتی پاراستنی تەندروستی دەروون و تەندروستیی كۆمەڵایەتی لە ئێران بە بێ بەرنامە ماوەتەوەو تا ئێستا هیچی بۆ نەكراوە.
ئەڵڵایاری دیارەی بێكاری بە یەكێك لە هۆكارەكانی تێكچوونی ڕەوان و زیانە كۆمەڵایەتییەكانی دەزانێ و دەڵێ، كەسانی بێكار هەست بە پووچی، بێ مانایی ژیان و بێ شوناسی دەكەن و ئەگەر ئەم بێكارییە بەردەوام بێ، ئەم كەسی تووشی تێكچوون و نەخۆشیی دەروونی دەبێ.
بە قسەی ناوبراو لە هەر ١٠٠ ئێرانی ٩٥ كەسی بۆ بژیوی ژیان بەردەوام لە دڵەڕاوكێ دان كە ئەم دڵەڕاوكێیە كۆمەڵێك گیروگرفتی دیكەی بەدواوە دێ.
سەرۆكی ڕێكخراوی سیستمی دەروونناسی دەڵێ پشكی بوودجەی تەندروستیی ڕەوان سەدی ٣ی بۆ لەبەر چاو گیراوە لە حاڵێكدا كە بە قسەی ناوبراو لە وڵاتانی ئورووپایی سەدی ٧ی بۆ تەرخان كراوە.
بەپێی دوایین ئامارەكانی وەزارەتی بێهداشت، دەرمان و خۆشبژێویی كۆمەلایەتی، ساڵانە ٤ هەزارو ٦٩ كەس بە شێوەی جۆراوجۆر خۆیان دەكوژن و لە ئێران ڕۆژانە ١١ كەس خۆی دەكوژێ و لە ڕیزبەندیی جیهانیدا لە پلەی ١٢٠ دایە.