فایلێکی دەنگیی نووری مالیکی، ڕێبەری حیزبی یاسا، بڵاو بووەتەوە و باس لەوە دەکا کە خەریکی جەماوەر کۆکردنەوەیە تا هێرش بکاتە سەر نەجەف و موقتەدا سەدر.
بەپێی هەواڵی هەواڵدەرییەکانی عێراق، ڕۆژی دووشەممە ٢٧ی پووشپەڕی ١٤٠١ی هەتاوی، فایلێکی دەنگیی نووری مالکی ڕێبەری حیزبی یاسا و سەرۆک‌وەزیرانی پێشووتری دەوڵەتی عێراق بڵاو بۆتەوە و باس لە کۆکردنەوەی جەماوەر بە دژی “موقتەدا سەدر” ڕێبەری ڕەوتی سەدر دەکا و دەڵێ: عێراق لە لێواری شەڕێکی وێرانکەردایە و خەباتی سیاسی لە دیپلۆماسی دەرچوو و تەنیا هێزی چەک دەسەڵات یەکلا دەکاتەوە لەبەر ئەوەی ئەگەر پرۆژەکەی سەدر لە ناو نەچێ تەنیا چارەسەر کوشتنی خودی موقتەدا سەردە.
دوای بڵاو بوونەوەی فایلی دەنگی مالکی، موقتەدا سەدر، لە لاپەڕەی تایبەتی خۆی لە تۆڕی کۆمەڵایەتیی تویتێر، وڵامی مالکی دایەوە و وتی: پێشنیارێک بە مالکی دەکەم بە قازانجی خۆیەتی ئەوەیش ئەوەیکە کە بە بێ دەنگیی لە شوێنێک دانیشێ و واز لە چالاکیی سیاسی بێنێ و لە هیچ ڕوویەکەوە مافی ئەوەی نییە لە دەوڵەتی عێراقدا بمێنێتەوە، لەبەر ئەوەی ناوبراو دەسەڵات بە دەستەوە بگری دەبێتە هۆی وێرانی و لە ناوچوونی عێراق و خەڵکەکەی.
شایانی باسە کە لەو فایلە دەنگییەدا مالکی بە دژی کورد و سونی و رەوتی سەدر قسە دەکا.
هەر لەو پێوەندییەدا میدیاکانی عێراق باس لە هەوڵی بە جێهێشتنی عێراق لە لایەن مالکییەوە دەکەن.
