لە ماوەی ساڵی ڕابردوودا تەنیا بۆ پۆشتەكردنی مزگەوتەكان ٤٤ میلیارد تمەن خەرج كراوەو بۆ دروستكردنی كۆمەڵە مزگەوتێكیش لە ماوەی ساڵەكانی ٩٣و ٩٤دا بڕی ٣٦٠ میلیارد تمەن خەرج كراوە.
جەواد سادق زادە، سەرۆكی ناوەندی چالاكییە ئایینییەكانی شارەداریی تاران گوتویەتی ئەم بوودجەیە تەنیا لە لایەن شارەدارییەوە تەرخان كراوەو باقی چالاكییەكانی دیكە كە بە مەبەستی دامەزراندنی مزگەوتەكان ئەنجام دەدرێن، ناگرێتەوە.
ناوبراو وێڕای ئاماژە بەم مەسەلە كە شاری تاران لە بواری بوونی مزگەوتەوە هەژارترین شارە، گوتی: ئێستا لەم شارە تەنیا ١٩٦٤ مزگەوت هەیە، ئەوە لە حاڵێك دایە كە ئەم شارە دەبێ بە لانی كەمەوە ٤ هەزار مزگەوتی هەبێ.
قسەكانی ئەم كاربەدەستەی ڕێژیم لەم بارەوە لە حاڵێك دایە كە لە ماوەی ٤٠ ساڵی ڕابردوودا هەوڵی سوننی مەزهەبەكانی تاران بۆ دامەزراندنی مزگەوتێكی تایبەتی سوننیییەكان لەگەڵ كارشكێنیی سەرجەم دامودەزگاو ئۆرگانە دەوڵەتییەكان بەرەوڕوو بۆتەوە.
