بۆ بەرزڕاگرتنی یادی شەهید دوکتور قاسملوو، بەبۆنەی ٣٣هەمین ساڵیادی تێرۆرکردنی، ئەویندارانی ڕێبازی شەهیدانی ڤیەن لە شاری پیرانشار بەو بۆنەوە چالاکی تەبلیغییان بەڕێوە برد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی سێشەممە ٢١ی پووشپەڕی ١٤٠١ی هەتاوی، ئەویندارانی ڕێبازی دوکتور قاسملوو و ئەندامانی دڵسۆزی حیزبی دێموکراتی کوردستان لە شاری پیرانشار، بۆ ڕێزگرتن لە یادی شەهید دوکتور قاسملوو و هاوڕێیانی وێرای میلیتازەکردنی ئەو شارە لەلایەن هێزە سەرکوتکەرەکانی ڕێژیمی ئێرانەوە، لە شەقام و شوێنە گشتییەکان بە بۆنەی ٢٢ی پووشپەڕ ساڵڕۆژی تێرۆرکردنی شەهید دکتور قاسملوو و هاوڕێیانی چالاکیی بەربڵاوی تەبلیغییان بەڕێوە برد و پەیمان و وەفایان لەگەڵ شەهیدان نوێ کردەوە.
ئەندامانی دڵسۆزی حیزبی دێموکراتی کوردستان لە گەڕەک و شەقامەکانی وەک؛ شەقامی حاجی سەید برایم، مزگەوتی “جامێع”ـی کۆن، گەراجی ئاواییەکان، بازاڕی چەو ، شەقامی ئازادی، مزگەوتی زەرگتەن و زۆربەی شوێنە گشتییەکانی ئەو شارە بە درووشمی تایبەت بەو بۆنەیە چالاکی تەبلیغییان بەڕێوە برد.
لە لایەن کۆمیسیۆنی تەشکیلاتی حیزبی دێموکراتی کوردستانەوە دەسخۆشی و ماندوو نەبوونی لە هاوڕییانمان لە شاری دێموکراتپەروەری پیرانشار دەکەین و ئاواتمان سەرکەوتنی زیاتریانە لە کار و چالاکییەکانیاندا.
