لە بەرەبەری ٢٢ی پووشپەڕ ٣٣هەمین ساڵوەگەڕی تیرۆرکردنی د.قاسملوو و هاوڕێیانی، کتێبێک لە ژێر ناوی “ئازادی لە هزر و ڕامانی د.قاسملوو”دا لە لایەن گۆڤاری تیشکەوە بڵاو کرایەوە.
ئەم کتێبە کە لە لایەن “عەلی مونەزەمییەوە” نووسراوە بە شێوەیەکی ئاکادیمیک پرسی “ئازادی” لە هزر و ڕامانی د.قاسملوودا شی کردۆتەوە و هەوڵی داوە کە نموونەیەکی باش لە پرسی “ئازادی” بەپێی ڕامانەکانی د.قاسملوو پێشکەش بە هەر تاکێکی کورد لە هەر پارچەیەکی کوردستان بە تایبەتی ڕۆژهەڵاتی کوردستان بکات، چونکە تا ئێستاش پرسی ئازادی ڕۆژەڤی جیهانە و ئەم پرسە هیچ ئالترناتیڤێکی دیکەی نییە و پێویستە ئێمە لێی تێبگەین و بزانین کە چ ئازادیێکمان دەوێ.
ئەم کتێبە لەلایەن نووسەرەوە پێشکەش بە هەموو ڕێبوارانی ڕێی ئازادی و بە تایبەتی خاتوو نەسرین قاسملوو و کاک عەبدوڵلا عیزەتپوور کراوە و لەم بەشە سەرەکییانەی خوارەوە پێک هاتووە:
– تیئۆری: ئازادیی ئەرێنی، ئازادیی نەرێنی و ئازادیی کۆماریخوازانە
ـ ئــازادی لە ڕوانگەی قاســملووەوە وەک ئانترۆپۆلۆژیســتێکی مارکسیســت ـ پەرتووکی کوردستان و کورد وەک بەڵگەی سەرەکی
ـ ئازادی لە ڕوانگەی قاسملووەوە وەک چەپێکی دێموکرات و پۆست ـ مودێڕنیست
ـ مانیفێستی ئازادیخوازی لەسەر بنەمای هزرەکانی قاسملوو
١-شایانی باسە کە نووسەر پێشتریش گرینگیی داوە بە خەبات و تێکۆشانی ڕێبەری شەهیدمان د.قاسملوو و دوو کتێبی لە ژێر ناوی:
١-هزر و ڕامانەکانی د.قاسملوو سەبارەت بە دیمۆکراسی بۆ ئێرانی چەند نەتەوە
٢-قاسملوو و خەباتی کوردانی ڕۆژهەڵات لە ڕوانگەی ڕاگەیاندنە نۆروێژییەکانەوە چاپ و بڵاو کراونەتەوە.
هەروەها نووسەر لە سەر مێژووی خەباتی حیزبی دێموکراتی کوردستانی ئێران لە باکووری ڕۆژهەڵاتی کوردستانیش پرتووکێکی لە ژێر ناوی “دیرۆکەکە ڤەشارتی” چاپ و بڵاو کردووە.
