جێگری ماڵی كرێكاری ئێران لە سەر ئەم باوەڕەیە كە نزیكەی سەدی ٩٠ی كرێكارانی ئێران گرێبەستی كاتییان هەیە، ئهو گوتی لەم ڕێژەیە سەدی ٦٧یان گرێبەستە كاتییەكانیان ڕێكەوتی هەیە و ئەوانی دیكە یان گرێبەستی سپی ئیمزایان هەیە یا هەر گرێبەستیان نییە كە بە كرێكارە شاراوەكان ناسراون.
حەسەن سادقی لە درێژەی قسەكانیدا گوتی: ئەم كرێكارانە زۆرتر لە كارگە بچووكەكاندا كار دەكەن و بیمە نەكراون و زۆربەی ڕووداوەكانی كاریش لەم كارگانە ڕوو دەدەن.
جێگری ماڵی كرێكار پێی وایە ئەم هێزە شاراوانەی كار، لە هەر چەشنە چاوەدێری كردن و پشكنینێكی ئیدارەی كار و دابین كردنی كۆمەڵایەتیی بە دوورن، چونكی ئەوان بیمە نەكراون و گرێبەستیشیان نییە و هیچ شوێن پێیەكیان لە كارگەكاندا بەدی ناكرێ.
سادقی هەروەها باسی لە گرینگترین گرفتەكانی كرێكارانی ئێران كرد و نەبوونی ئەمنیەتی شوغڵی بە گرینگترین كێشەكانی ئەوان زانی.
لە لایەكی دیكەوە سەرۆكی كانوونی بەرزی ئەنجومەنه سینفییەكانی كرێكارانی ئێرانیش وێڕای ئاماژە بەم مەسەلە كە زیاتر لە سەدی ٦٠ی كرێكاران ٢ شوغڵیان هەیە، گوتی داوای كرێكارەكان لە دەوڵەت ئەوەیە كە هەوڵێكی بنەڕەتی بۆ دابین كردنی ئەمنیەتی شوغڵی و بەرز بوونەوەی ئاستی داهات و بژێوی ژیانی ئەوان بدا.
غوڵامڕەزا عەبباسی گوتی: گرینگترین هۆكاری هۆگرایەتیی كرێكارەكان بە شوغڵە لاوەكییەكان و كار و شوغڵی دووهەم، مەودای زۆری نێوان لانی كەمی هەقدەست لەگەڵ ئاستی تێچووی بنەماڵەی كرێكارەكانە.
ناوبراو لە بەشێكی دیكەی قسەكانیدا گوتی: لە حاڵێكدا كە لانی كەمی هەقدەستی كرێكاران ٨١٢ هەزار تمەنە، سەبەتەی تێچووی بژیوی بنەماڵەی كرێكاران لە هەر مانگدا خۆ لە ٣ میلیۆن و ٣٠٠ هەزار تمەن دهدا.