مەحموود جامساز، یەکێک لە ئابووریناسی ئێران، لە لێدوانێكدا بۆ ئیلنا گوتوویەتی دەوڵەتی حەسەن ڕووحانی سەرەڕای تووش بوون بە تەنگانەی لە ڕادەبەدەری ماڵی، لەگەڵ دابەزینی سەرسوڕهێنەری نرخی نەوتیش بەرەوڕوو بۆتەوە كە نەتیجەكەی كەسریی زۆری بوودجەی ئەمساڵە.
مەحموود جامساز لە زمان كاربەدەستانی كۆماری ئیسلامیی ئێرانەوە گوتوویەتی بوودجەی ئاوەدان كردنەوەی ئەمساڵ لەگەڵ كەسریی ٤٨هەزار میلیارد تمەن بەرەوڕوو بۆتەوە. ناوبراو گوتوویەتی لەم بوودجەیەدا داهاتی دەوڵەت لە ڕێگەی ماڵیاتەوە ١١٠ هەزار میلیارد تمەن پێشبینی كراوە كە بەهۆی ئیسلاح نەكرانی نیزامی ماڵیات ئەم داهاتەش دەست ناكەوێ.
ئەم ئابووریناسە ئێرانییە لە بەشێكی دیكەی قسەكانیدا گوتوویەتی جگە لە ماڵیاتەكان، ئەم داهاتەی دیكە كە لە بوودجەی ساڵی ٩٥دا پێشبینی كراوە بڕی زیاتر لە ٦٨ هەزار میلیارد تمەنە كە لە ڕێگەی فرۆشی نەوتەوە وەدەست دەوڵەت دەكەوێ كە ئەویش بەهۆی دابەزینی بەردەوامی نرخی نەوت بۆتەوە هیچ.
ناوبراو لە درێژەدا گوتوویەتی ئێستا ٤٠٠ هەزار میلیارد تمەن پرۆژەی ئاوەدان كردنەوەی نیوەچڵ بە سەر دەستی دەوڵەتدا ماوەتەوە و قەرزی دەوڵەت بە بانكەكان، بانكی ناوەندی، بیمەی كۆمەڵایەتی و كۆمەڵێكی دیكە لە ناوەندەكان، سنووری ٥٠٠ هەزار تمەنی تێپەڕاندووە.
بەڕای مەحموود جامساز دەوڵەت توانای پاك كردنی ئەم قەرزە زەبەلاحانەی نییە. ناوبراو ئاستی قەرزی دەوڵەت بە بانكەكانی ١٠٠ تا ١٥٠ هەزار میلیارد تمەن مەزندە كردووە و گوتوویەتی: هیچ گومان لەوەدا نییە كە ئەم قەرزە كاریگەریی خراپ لەسەر ئابووریی ئێران دادەنێ.
