عەلیڕەزا جەمشیدی، سەرۆكی ڕێكخراوی سزاكانی حكومەتی ئێران لە بەرنامەیەكی تلویزیۆنیدا لەبارەی گیروگرفتی بەرەنگاربوونەوەی قاچاغچیان لە ئێران گوتی ئیرادەی میللی و باوەڕی جیددی بۆ بەرەنگاربوونەوی چاقاغچیان لە ئێراندا نییە.
جەمشیدی هەروەها دەڵێ ناوچەی ئازاد و ناوچە تایبەتییەكانی ئابووری نە تەنیا گیروگرفتی خەڵكی سنوورەكان و خەڵكی هەژار چارەسەر ناكەن بەڵكوو بوونهتە ناوەندێك بۆ قاچاغچیان.
جەمشیدی ئاستی قاچاغی كاڵا و دراوی بۆ ئێران نزیك بە ٢٠ میلیارد تمەن مەزندە كردوە. ناوبراو پشتڕاستی كردەوە كە لە ئێران ئیرادە و باوەڕی جیددی بۆ بەرەنگاربوونەوەی قاچاغچیان نییە و مافیاكانی سەروەت و سامان و دەسەڵات دهوروبهری بەشەكانی جێبەجێكار و بەرپرسانی ئهم وڵاتهیان تەنیوە.
بە قسەی سەرۆكی ڕێكخراوی سزاكانی حكومەتی بە پێی مادەی 3 قانوونی بەرەنگاربوونەوە قاچاغچیانی دراو و كاڵا، وەزارەتخانەكانی دادگوستەری، ئیتلاعات، ئابووری و دارایی، وەزارەتی نێوخۆ، دەرەوە، پیشەسازی، سامانەكان و بازرگانی، ڕێگەوبان و شارسازی، نەوت، جیهادی كەشاوەرزی، بێهداشت، دەرمان و فێركردنی پزیشكی، هێزە چەكدارهكان و ڕێكخراوی سزاكانی حكومەتی سەرپەرستانی سەرەكیی بەرەنگاربوونەوەی قاچاغچیەكانن بەڵام لە ماوەی یەك ساڵی ڕابردوودا لە كۆبوونەوەی ستادی بەرەنگاربوونەوەی قاچاغچیانی كاڵاو دراو تەنانەت بۆ یەك جاریش هەموو وەزیرەكان بەشدار نەبوون.
جەمشیدی گوتی، بڕیارەكانی ئەم ستادەش بە جیددی نەگیراون و زۆربەیان جێبەجێ نابن. بە قسەی ناوبراو تەنیا سەدی ١٠ی ئەم حوكمانەی دەردەكرێن لە لایەن ڕێكخراوی سزا حكوومەتییەوەیه.
بە قسەی ئەم كاربەدەستەی ئێران لە نێوان سەدی ١٠ تا ١٥ی قاچاغچیانی ئێران قاچاغكردنی موبایل دهبینرێ كە تا ئاستی ٢ میلیارد دۆلار مەزندە كراوە. جەمشیدی وێڕای ئاماژە بەم بابەتە كە هێندێك لەم كەسانە لەبەر ١٠ میلیۆن تمەن لە زینداندا دەمێننەوە گوتی بەڵام قاچاغچییە گەورەكان لە ئێران لە پەراوێزێكی ئەمن دان و لە پێڕاگەیشتنی هێندێك لە پەروەندەكانیان تەنیا گریانمان پێ دەمێنێتەوە.
سەرۆكی ڕێكخراوی سزاكانی حكومەتی وێڕای ئاماژە بە پەروەندەی قاچاغی نەوت كە بایی ٣٦ میلیارد دۆلار بووە گوتی بۆ تاوتوێكردنی ئەم پەروەندەیە ١٠ كۆبوونەوە بەڕێوەچوو، بەڵام بە قسەی ناوبراو لە زەوی و زەمانەوە فشاریان دێنا كە ئەم پەروەندەیە بە هیچ ئەنجامێك نەگا.
عەلیڕەزا جەمشیدی لە بەشێكی دیكەی قسەكانیدا گوتی، ئەگەر بمانهەوێ كەسێك لە گومروك دەربكەین لە سەد جێوە پێوەندیمان پێوە دەگرن و فشار دێنن كە ئەم كەسە نابێ دەربكرێ.
هەروەها ناوبراو لە كۆتاییدا گوتی هەر ئێستا ١٧٠ گومروك لە ئاستی ئێراندا هەیە ئەمە لە حاڵێكدایە كە وڵاتانێك بە بارستایی ٤ یان ٥ بەرابەری هەناردە و هاوردەی ئێران تەنیا ٥ گومروكیان هەیە.