لاوێکی سەردەشتی بە دووچرخە پەیامێکی گرینگی گەیاندە کاربەدەستانی کۆماری ئیسلامی

لاوێکی سەردەشتی بۆ راکێشانی سەرنجی کاربەدەستانی حکوومەتی ئێران بۆ پاککردنەوەی مەیدانەکانی مین‌و هەروەها بە دروشمی “جیهانێک بەبێ مین” رێگای نێوان چەند شاری پارێزگاکانی ورمێ‌و سنەی بە دووچرخە بڕی.
“رامان زاهیری”، وەزشکارو هونەرمەندی دانیشتووی شاری سەردەشت بۆ راکێشانی سەرنجی کاربەدەستانی حکوومەتی ئێران‌و هەروەها بیروڕای گشتی بۆ پاککردنەوەی مەیدانەکانی “مین” کە بە درێژایی ناوچە سنوورییەکانی نێوان رۆژهەڵات‌و باشووری کوردستان لە سەردەمی شەڕی هەشت ساڵەی دوو دەوڵەتی ئێران‌و عێراق چێندراون‌و پاش تێپەڕبوونی ٢٧ ساڵ لە راوەستان‌و تەواوبوونی شەڕەکە هێشتا ئەو مەیدانە “مین”انە پاک نەکراونەوەو رۆژ نییە هەواڵی گیانلەدەستدان‌و برینداربوونی چەند کەسێک لە مێدیاکانەوە بڵاو نەکرێتەوە، بە دووچەرخە رێگای نێوان چەند شاری بڕی‌.
بەپێی هەواڵی ماڵپەڕی ڕۆژهەڵات تایمز رامان زاهیری ماوەی مەودای ٤٥٠ کیلۆمیتریی نێوان شارەکانی سەردەشت، بانە، سەقزو سنەی بە دووچەرخەکەی بڕیوە‌و رۆژی سێشەممە ٢١ی بانەمەڕ گەیشتە شاری مەریوان‌ کە بە دوائامانجی گەشتەکەی “رامان” دیاری کرابوو.
هەم هەنگاوە سیمبولیکە، لەلایەن “ئەنجوومەنی لاوانی هەتاو” لە شاری سەردەشت پلانی بۆ داڕێژرابوو و “رامان زاهیری” لە میانەی گەشتەکەی‌دا لەگەڵ قوربانیان‌و بەرکەوتووانی “مین” دیداری دەکردو دیارییەکی “ئەنجوومەنی هەتاو”ی پێشکەش دەکردن.
هەروەها ناوبراو لە چەند خاڵێکدا داواکاریی خەڵکی ناوچەکە بەمجۆرە رادەگەیەنێ:
١- لە واژۆکردنی کۆنوانسیۆنی نێونەوەتەوەیی ١٩٩٧ بۆ بەکارنەهێنانی “مین” کە ١٥٦ وڵات تا ئێستا ئەو رێککەوتنەیان واژۆ کردوەو، پەلە بکرێ‌.
٢- کۆکردنەوەو پاککردنەوەی مەیدانەکانی “مین” سەرجەم ئەو ناوچانە بگرێتەوە کە پێشتر پاک کراونەوەو یان تا ئێستا هەروەک خۆیان ماون‌و سەرنج بدرێتە ئەو شوێنانەی کە بە هۆی خزینی زەوی‌و لافاوەوە مینەکان جێگۆڕکێیان پێ کراوە.
٣- هاوکاریی ماڵی‌و مەعنەوی دامودەزگاکانی حکوومەت لە کەسانەی بەهۆی “مین”ەوە زەرەرمەند بوون.
٤- وشیارو ئاگادارکردنەوەی دانیشتوانی ناوچە مێنڕێژکراوەکان تا پاقژکردنەوەی تەواوی ناوچەکەیان لە مین.