ڕاگەیاندنەکانی سەر بە ڕێکخراوی موجاهێدینی خەلق، لەسەر بنکەی بەسیجی تاران ڕایانگەیاند کە، ئەو بنکەیە دەورونەخشێکی گرینگی لە سەرکوتی خەڵکی ناڕازیی تاران هەبووە.
ڕێکخراوی موجاهێدینی خەلق، پاش بڵاوبوونەوەی ڤیدیۆگەلێک لە تۆڕە کۆمەڵایەتییەکان سەبارەت بە چەندین تەقینەوەی بەهێز لە پایگای بەسیجی” مالکی ئەشتەر” لە تاران، ڕۆژی شەممە ١١ی پووشپەڕی ١٤٠١ی هەتاوی لە بەیاننامەیەکدا رایگەیاند کە بەهۆی دەورونەخشی ئەو بنکەی بەسیجە لەسەر کوتی خەڵکی ناڕازیی تاران، هێرشی کردۆتە سەر ئەو مۆڵگەیەی ڕێژیم.
هەرلەم پێوەندییەدا ڕاگەیاندنەکانی سەر بەو ڕێکخراوە ئۆپۆزیسیۆنە ئێرانییە، هێرش بۆ سەر ئەو بنکەیەیان لەدرێژەی هێرشەکانی دیکەدا ناوبرد و ئاماژەیان بە هێرشەکانی پێشووی ئەو ڕێکخراوەیە بۆ سەر ناوەندەکانی بەسیج، حەوزەکانی عێلمیە و قەرارگاکانی سپای تێرۆریستی پاسدارانی ڕێژیم کردووە.
جێگەی ئاماژەیە کە ڕێکخراوی موجاهێدینی خەلق، پێشتریش هێرش‌گەلێکی کردبووە سەر ژێرخانە ئابوورییەکانی شارەوانی تاران و کاناڵە تەلفیزیۆنییەکانی دەنگوڕەنگی ڕێژیم.
