جێگری حوقووقیی، كاروباری مەجلیسو هاواهەنگیی كاروباری پارێزگاكانی وەزارەتی وەرزش و لاوان گوتی: بۆ تەواو كرانی پرۆژە نیوەچڵە وەرزشییەكانی ئێران زیاتر لە ٨ هەزار میلیارد تمەن ئیعتبار پێویستە.
ڕۆژی سێشەممە ئەمیرڕەزا خادەم لە كۆبوونەوەی سەرۆكەكانی هەیئەتە وەرزشییەكانی پارێزگای سنەدا گوتی لە حاڵی حازردا بە سەرنجدان بەو كەمە بوودجەی كە لە بەر دەستدایە ناتوانین ئەم پرۆژە ناتەواوانە بە ئاکام بگهیهنین.
ناوبراو هەروەها گوتی: لە ماوەی ساڵانی ڕابردوودا ههر له گۆترهو بەبێ پێشبینی كردن و دابینكردنی بوودجە، دەستیان بە زۆر لەم پرۆژە وەرزشیانە كردووەو ئێستاش تەواو كرانی ئەم پرۆژانە گەورەترین كێشەی بەردەم بەشی وەرزش له وڵاتە.
خادەم وەبیری هێنایەوە، نابێ كاربەدەستانی پارێزگا تا تەواوبوونی ئەم پرۆژە وەرزشییە نیوەچڵانە دەست بە هیچ پرۆژەیەكی دیكە بكەن.
بە قسەی ناوبراو بوودجەی ساڵانەی وەرزش و لاوان تەنیا ١٨٠ میلیارد تمەنە.