دەبێ چۆن باسی ڕێز و گەورەییت کەم لاوی پێشمەرگە
کە ژینت پڕ لە شانازی و شەڕەف، ئازایەتی و جەرگە
دڵت کانگای ئەوینی خەڵکی زۆرلێکــــــــراوی بێ‌بەرگە
بژی باسکی بەهێزی گەل، کوڕی سەربەرزی کوردستان
بژی بازی چیا و دۆڵ و پڵینــــــــــــــگی گورجی دارستان
چلۆن شێعرێ بڵێم بۆ تۆ کە بتوانێ شیاوت بێ؟
لە سەردێڕا چ ناوێ دابنێم هاوشانی ناوت بێ؟
مەبەست چۆن هەڵبژێرم تاکوو تاریفی تەواوت بێ؟
بژی باسکی بەهێزی گەڵ، کوڕی سەربەرزی کوردستان
بژی بازی چیاودۆڵ و پڵینـــــــــــــــــــگی گورجی دارستان
هەوای ڕابواردنی خۆشی ژیانی خـــــۆت لە خۆتا کوشت
گەڵاڵەی ژینی خۆش و بێ‌پەرۆشی خەڵکەکەت داڕشت
بەهێزی شان و پیلت بۆ هەژاران بوویە دەست و پشت
بژی باسکی بەهێزی گەل کوڕی سەربەرزی کوردستان
بژی بازی چیا و دۆڵ و پڵینــــــــــــــگی گورجی دارستان
ئەتۆی گیانبازی چەرخی ڕەوڕەوەی شۆڕش دەسووڕێنی
قەڵای زۆردارەکان و دوژمنانـــــــــــــــی گەل دەڕووخێنی
پەتی دیلی لە پێی داماو و زۆرلێــــــــــــکراو دەپچڕێنی
بژی باسکی بەهێزی گەل، کوڕی سەربەرزی کوردستان
بژی بازی چیا و دۆڵ و پڵنــــــــــــــــــگی گورجی دارستان
گەلی ژێردەست بە تۆیە دڵنیا و دڵخۆش و پشت‌ئەستوور
ئەتۆی بەرعۆدە بۆ پێک‌هاتنی ئامانجی بەرز و دوور
بەڵێنی گیانلەسەردەستیت دەنووسی تۆ بە خوێنی سوور
بژی باسکی بەهێزی گەل، کوڕی سەربەرزی کوردستان
بژی بازی چیا و دۆڵ و پڵنــــــــــــــــــگی گورجی دارستان
بە ئیمانی، نەترسی، بێ‌ڕیا و بێ‌فیز و ساکاری
لە بوختان و درۆ تانە و ئیفادە و دەعیە بێزاری
بەنەزم و ڕێک و پێک و توند و تۆڵ و ورد و وشیاری
بژی باسکی بەهێزی گەل، کوڕی سەربەرزی کوردستان
بژی بازی چیا و دۆڵ و پڵنــــــــــــــــــگی گورجی دارستان
بەرەو پێش پشتی زەحمەتکێشی شار و ڕەنجبەری لادێ
ورە و هێز و تەوژمی خەڵکی چەوساوەت بەدوو دا دێ
دەمی پچڕانی زنجیران نێـــــــــزیکە و ڕۆژی گەل دادێ
بژی باسکی بەهێزی گەل، کوڕی سەربەرزی کوردستان
بژی بازی چیا و دۆڵ و پڵنــــــــــــــــــگی گورجی دارستان
چ خۆشە کاتی سەرکەوتن، کە ڕووخا کاخی بێدادی
لە نێو ئاهەنگ و گۆرانی و سروودی جێژنی ئازادی
لە ئامێزت بگرم و جا بگوڕڕێنم بە دڵـــــــــــــــــشادی
بژی باسکی بەهێزی گەل، کوڕی سەربەرزی کوردستان
بژی بازی چیا و دۆڵ و پڵنــــــــــــــــــگی گورجی دارستان
