سەرەڕای پشتیوانیی فڕۆكە شەڕكەرەكانی ڕووسیە، ئەندامانی سپای پاسداران لە ناوچەی “خان تومان” لە ناچەی حەلەب شكستیێکی قورسیان خواردو تا ئێستا نەیانتوانیوە ئەم ناوچەیە وەربگرنەوە.
لە كاردانەوە بە ئەم شكستەی ئێران لە دەورووبەری حەلەب، حوسێن ئەمیرعەبدوڵاهیان، جێگری عەرەبی_ ئافریقایی وەزارەتی دەرەوەی كۆماری ئیسلامیی ئێران سەركەوتنی دژبەرانی بەشار ئەسەدیان لە خان تومان مەحكوم كردو گوتی ئەم هێزانە لە دەرەوە پشتیوانیان لێ دەكرێ.
ناوبراو نەیگوت ئەگەر دژبەرانی بەشار ئەسەد پشتیوانیی لایەنەکانی دیکەیان لەگەڵە، ئەدی سپای پاسدارانو حیزبوڵلای لوبنان لە شاری حەڵەبو لە شەڕی سووریەدا چیدەکەن.
بەپێی ڕاپۆرتی هەواڵدەریی فارس نزیك بە سپای پاسداران، زیاتر لە ٨ هەزار چەكداری دژبەری ڕێژیمی سووریە لە خان تومان بە چەكی پێشكەوتوو دامەزراون.
ئەرتەشی بەشار ئەسەد جگە لە سپای پاسداران، لە لایەن هێزەكانی ئەفغانی گوردانی فاتموین، حیزبۆڵای لوبنانو هێزەكانی شیعەی عێراق پشتیوانی لێدەكرێ، هێشتا نەیتوانیوە هێزەكانی دژبەری خۆی لەم ناوچەیە وەدەر بنێ.
لە شەڕو پێكدادانی حەلەب ١٣ ئەندامی سپای پاسداران لە سووریە كوژران و ٢١ كەسی دیكەش بریندار بوون.
ئێران هەروا پێداگریی دەكاتەوە كە ناردنی هێزی سپای پاسداران بۆ شەرشی سووریە لایەنی ڕاوێژكاری نیزامی بە هێزەكانی بەشار ئەسەدە. بەڵام كوژرانو برینداربوونی كۆمەڵێك لە ئەفغانییەكانی تیپی فاتمیون لە ناوچەی خان تومان ئەمە دەردەخا كە ئێران نەتەنیا سپای پاسداران و ئەرتەشی وڵاتەكەی بۆشەڕی سووریە دەنێرێ، بەڵكوو لە كۆچبەرانی ئەفغان كە پەنایان بۆ ئێران هێناوە بۆ پشتیوانی كردنی ڕێژیمی بەشاری ئەسەد كەڵك لەوانەش وەردەگرێ.