سەرۆكی دەفتەری تەندروستیی ڕەوانو ئیعتیادی سەر بە وەزارەتی بێهداشت بێكاریی وەك هۆكاری سەرەكیی خۆكوژی ناو بردوەو دەڵێ، لە ئێران ئەوانەی دیپڵۆمیان هەیە زیاتر لە هەموو گرووپو دەستەکانی دیکە خۆیان دەكوژن.
ئەحمەد حاجبی لە کۆبوونەوەی تاوتوێكردنی خۆكوژی لە ئێران كە بەبەشداریی وەزیری بێهداشت بەڕێوە دەچێ، گوتی لە ئێران ژنان زیاتر لە پیاوان خۆیان دەكوژن، بەڵام پیاوان لە خۆكوژیدا زیاتر سەرکەوتوون لەبەر ئەوەی كە خۆكوژیی پیاوان بە هۆی گیروگرفتی گەورەوە ئاڵۆزترە.
حاجبی وێڕای ئاماژە بە هۆكاری سەرەكیی خۆكوژی لە ئێران كە بێكارییە گوتی لە پلەی دووهەمیشدا ژنانی ماڵدار زیاتر خۆیان دەكوژن.
سەرۆكی دەفتەری سڵامەتی ڕەوانو ئیعتیادی سەر بە وەزارەتی بێهداشت گوتی تا ساڵی ٩١ زیاتر لە سەدی ٢٠ی خۆكوژییەكان لە ناوچەی ئاواییەكانو سەدی ٨٠ی لە شارەكان بووە، بەڵام لە ساڵی ٩٢ تا ٩٤ ئەم ئامارە تاڕادەیەك گۆڕانكاریی بەسەردا هاتووەو، لە شارەكان سەدی ٧٠و لە ئاواییەكانی بە سەدی ٣٠ هەڵکشاوە.
ناوبراو هەروەها گوتی زۆرترین خۆكوژی پێوەندیی بەو گرووپە هەیە دیپڵۆمیان هەیەو کاریان دەست ناکەوێو كەمترین ڕێژەی خۆكوژیش لە خوێندەوارانی ئاستی فەوقی لیسانسو سەرترە. هەروەها ئامارەکانی تا ساڵی ٩٢ ئەمەیان دەرخستووە كە خۆكوژی لە نێو سەڵەتەكاندا زیاتر بووە، بەڵام لە ساڵەکانی ٩٣ و ٩٤ دا زۆربەی ئەو ئەم كەسانەی خۆیان كوشتووە خێزاندار بوون.
بەڕێوەەچوونی ئەم كۆبوونەوە یلە سەر دیاردەی خۆکوژی لە ئێران لە حاڵێك دایە كە لە سەرەتا ئەمساڵەوە تا ئێستا زیاتر لە ٣٠ كەس لە ڕۆژهەڵاتی كوردستان كۆتاییان بە ژیانی خۆیان هێناوە.
