٣٤ كەسی دیكە لە ئەندامانی سپای پاسداران لە سووریە کوژرانو بریندار بوون.
حوسێنعەلی ڕەزایی، بەرپرسی پێوەندیی گشتیی “سپای كەربەلا” لە پارێزگای مازەندەران پێی لێناوه که ١٢٢ ئەندامی دیكەی سپای پاسداران لە سووریه كوژراونو ٢١ كەسی دیكەش بریندار بوون. هەروەها هێندێك لە سەرچاوەكانی هەواڵ دەڵێن كە كۆمەڵێكی زۆر لە ئەندامانی ئەفغانیی تیپی فاتمیون لە ناوچەی خان تومان لە دەورووبەری شاری حەلەب كوژراون، یان بەدیل گیراون.
سایتی ئینتێرنێتیی “جام جم” ڕۆژی شەممە ١٨ بانەمەڕ لە ڕاپۆراتێكدا بڵاوی کردهوه که بەدوای شەڕه قورسهکهی ڕۆژی ڕابردوو لە “ریف”ی حەلەب لە سووریە كۆمەڵێك لە هێزەكانی ئێران كوژراونو هێندێكی دیكەش بە دیل گیراون. ئەم سایتە وێنەی كۆمەڵێك لە دیلەكانی بڵاوكردۆتەوە، بەڵام ئاماژەی بە سەرچاوەی وێنەكان نەكردوە.
بەپێی هەمان سەرچاوە، لە شەڕو پێكدادانێكی قورس لە شارۆچكەی خان تومان لە نزیكیی شاری حەلەب هێزەكانی دژبەر بەسەر ئەرتەشی بەشار ئەسەدو هاوپەیمانانهکانی سەركەوتن.
ڕێكخراوی چاودێریی مافەكانی مرۆڤ كە مەقەڕەكەی لە نیویۆڕكە، ڕۆژی هەینی ٩ی ڕێبەندان ڕایگەیاندبوو كە ئێران هەزاران كەسی لە كۆچەرانو پەناخوازانی ئەفغانی بە مەبەستی بەشداریكردن لە شەڕی سووریە ناردوە. بەپێی ئەم ڕاپۆرتە ئێران بۆ بەدەستهێنانی ڕەزامەندیی ئەم كەسانە ئهوانی نەتەنیا لە ڕێگەیانی هاندانو تهماح وهبهرنان، بەڵكوو هێندێك جار بە هەڕەشەو ترساندن بەرەوە بەرەكانی شەڕ لە سووریە ناردوونی.
هاوكات ڕۆژی شەممە عەلی ئەكبەر وەلایەتی، ڕاوێژكاری باڵای ڕێبەری كۆماری ئیسلامیی ئێران كە سەردانی سووریەی كردوه، لە چاوپێكەوتنێكدا بە بەشار ئەسەد ڕاگهیاندوه که، عەلی خامنەیی بەردەوام بۆ سەركەوتنی بەشاری ئەسەد دوعایه دەكا.