سێهەمین ساڵیادی خۆسووتاندنی نیكمەرد تاهیری، هاووڵاتیی یارسانی كە بە هۆی سووكایەتیی کاربەدەستانی کۆماری ئیسلامی بە ئایینی یارسان خۆی سووتاند، بە بەشداریی سەدان كەس لەسەر مەزارەکەی بەڕێوەچوو.
ئەو کۆڕیادە بە پێداگریی بەشداران لە سەر داوای بە ڕەسمی ناسینی ئەم ئایینەو هەڵگرتنی فەرقو جیاوازیدانانی سیستماتیک دەرحەق بە شوێنکەوتووانی ئایینی یاری كۆتایی پێهات.
بەپێی ڕاپۆرتی پەیامنێری کوردستانو کورد ڕێوڕەسمەكە ڕۆژی سێشەممەی حەوتووی ڕابردوو بە هۆی ڕێگریی هێزەكانی ڕێژیم لە بەڕێوەچوونی ئەم ڕێوڕەسمە لە تالارەكانی نێو شار، بە ناچاریو لە ژێر كۆنتڕۆڵی وردی هێزە ئەمنیەتییەكانی شاری سەحنەو لەسەر گڵكۆی ناوبراو بەڕێوەچوو.
لەم ڕێوڕەسمەدا كۆمەڵێك وتار پێشکێش کرانو بەشداران وێڕای ناڕەزایەتی دەربڕین بە پێشێلکردنی مافی هاووڵاتیبوونیان لە ئێرانو بەڕەسمی نەناسینی ئایینیەکەیان، داوایان لە كاربەدەستانی جكومەتی كرد كە وەڵامی داوای خەڵكی یاری بدەنەوەو دەست لە هەڵاواردنی سیستماتیكو ئامانجداری یارسانەکان هەڵبگرن.