بنکەی سەربازیی عەینول‌ئەسەد، لە پارێزگای ئەنباری عێراق و شوێنی نیشتەجێی هێزکانی ئەمریکا، کرایە ئامانجی هێرشی مووشەکی.
بەپێی ڕاپۆرتی هەواڵدەریی ئەلعەرەبییە، شەوی دووشەممە لەسەر سێشەممە ١٠ی جۆزەردانی ١٤٠١ی هەتاوی، بنکەی سەربازیی عەینول‌ئەسەد لە پارێزگای ئەنبار هەڵکەوتوو لە ڕۆژاوای عێراق کە شوێنی نیشتەجێی هێزەکانی ئەمریکا و هاوپەیمانانە، کرایە ئامانجی شەش مووشەک.
هەرلەو پێوەندییەدا بەرپرسێکی هێزە هاوپەیمانەکان کە نەیویستووە ناوی ئاشکرا بێ بە هەواڵدەریی “فەرانسە”ـی ڕاگەیاندووە کە بنکەی سەربازیی عەینول‌ئەسەد لەلایەن هێزە چەکدارەکانی سەر بە ڕێژیمی ئێرانەوە کراوەتە ئامانج و تا ئێستا هیچ خەسارێکی گیانیمان نەبووە.
جێگەی ئاماژەیە کە تا کاتی ئامادەکردنی ئەم هەواڵە هیچ گرووپێک بەرپرسایەتیی ئەو هێرشەی وەئەستۆ نەگرتووە.
