لاوێکی خەڵکی کرماشان لە ژێر ئەشکەنجەی هێزەکانی رێژیمدا گیانی لە دەست دا.
هاوڵاتیەکی کورد خەڵکی کرماشان بە ناوی موحسین عەباسی تەمەن ٣٩ ساڵ کە لەلایەن ناوەندی بەرەنگاربوونەوەی ماددە هۆشبەرەکانی شاری کەرەج دەستبەسەر و بە سەختی ئەشکەنجە کرابوو، دوای گوازرانەوەی بۆ بەندیخانەی بوئین زەهرای ئەو شارە بە هۆی سەختی برینەکانییەوە گیانی لە دەست دا.
موحسین عەباسی سەرەتای خاکەلێوەی ئەمساڵ لەلایەن هێزەکانی ڕیژیمەوە دەسبەسەر کرابوو و دوای یەک مانگ ئەشکەنجە کردن بە مەبەستی وەرگرتنی دانپێدانانی زۆرەملێ ڕۆژی پێنجشەممەی هەفتەی ڕابردوو، ١٥ی بانەمەڕ، گوازرابووەوە بۆ بەندی قەرەنتینەی بەندیخانەی بوئین زارای شاری کەرەج و ڕۆژی هەینی ١٦ی بانەمەڕ واتە یەک ڕۆژ دوای گوازرانەوەی بۆ بەندیخانە، بە هۆی سەختی برینەکانییەوە گیانی لە دەست داوە.
تەرمی موحسین عەباسی دوای پێنج ڕۆژ ئەمڕۆ سێشەممە ٢٠ی بانەمەڕ ڕادەستی بنەماڵەکەی کراوەتەوە و لە گوندی «دێ مووسا» سەر بە شارۆچکەی سەرفیروزئاوای کرماشان ئەسپەردەی خاک کراوە.
