ڕێوڕەسمی کۆمسای لە هەورامانی تەخت بە بەشداری ئاپۆڕای خەڵکی کوردستان بەڕێوەچوو.
ڕۆژی هەینی ١٦ی بانەمەڕی ساڵی١٤٠١ی هەتاوی، ڕێوڕەسمی کۆمسای، بە بەشداریی هەزاران کەس لە هۆگرانی کەلتوور و شارستانیەتی هەورامان، لە هەورامانی تەخت بەڕێوە چوو.
ئەم بۆنەیە هەر ساڵە و دوو جار لە مانگەکانی ڕێبەندان و بانەمەڕ(٤٥رۆژ دوای نەورۆز، لە نێوەڕاستی بەهار) بەڕێوەدەچێت و گەشتیارێکی زۆر بەشداریی دەکەن.
کۆمسای رێوڕەسمێکی کۆمەڵایەتیی – کولتوورییە. شارەزایانی مێژوو و ئەفسانەناسان دەڵێن، رێوڕەسمەکە مێژوویەکی چەند هەزار ساڵەی هەیە و لە کۆندا بۆنەیەک بووە بۆ هەڵبژاردنی ئەنجوومەنی پیران لە گوندەکانی هەورامانی تەخت، سەری پیر، وەیسیا، رووەوەرێ و کەماڵە کە ئەو پێنج گوندە ئێستا تێکەڵبوون و هەورامانی تەخت پێکدێنن.
لە کۆمسایدا مەڕوماڵات دەکرێتە قوربانی، زیکر و نزا دەکرێت، دەف لێدەدرێت، هۆنراوە دەخوێندرێتەوە، خواردنی تایبەت دروست دەکرێت و بەسەر خەڵکدا دابەش دەکرێت.
