وەزارەتی دەرەوەی ڕووسیە، سەرەڕای بانگکردنی باڵوێزی ئاڵمان بۆ ئەو وەزارتخانەیەی ڕووسیە، ٤٠ دیپلۆماتی وڵاتی ئاڵمانی لە ڕووسیە دەرکردووە.
وەزارەتی دەرەوەی ڕووسیە، ڕۆژی دووشەممە ٥ی بانەمەڕی ١٤٠١ی هەتاوی، پاش بانگکردنی “ئەندێریاس فۆن گێر”، باڵوێزی ئاڵمان لە ڕووسیە و ناڕەزایەتی دەربڕین لەهەمبەر سیاسەتەکانی ئاڵمان و دەرکردنی ٤٠ دیپلۆماتی ڕووسی لە ئاڵمان، لە بەیاننامەیەکدا ڕایگەیاند کە؛ بە تۆڵە ئەو کارەی ئاڵمان، سەبارەت بە دەرکردنی دیپلۆماتەکانی ڕووسیە لە ئاڵمان، ڕووسیەش ٤٠ دیپلۆماتی ئاڵمانی لە خاکی ڕووسیە دەردەکا و ئیزنی چالاکییان لە ڕووسیە پێ نادا.
جێگەی ئاماژەیە کە؛ ئاڵمان لە کاردانەوە بە هێرشی سەربازیی ڕووسیە بۆ سەر ئۆکراین، ٤٠ کارمەندی ناوەندە دیپلۆماتیکەکانی ڕووسیەی لە خاکی ئاڵمان دەرکردووە.
