عومەر قازی، کەسایەتیی نەتەوەیی، نیشتمانپەروەر و تێکۆشەرێکی دێرینی حیزبی دێموکراتی کوردستان و بزاڤی ڕزگاریخوازی نەتەوەی کورد لە شاری مەهاباد ماڵاوایی لە ژیان کرد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، ڕۆژی چوارشەممە ۳۱ی خاکەلێوەی ۱٤۰۱ی هەتاوی، کاک عومەر قازی کەسایەتیی نەتەوەیی ،نیشتمانپەروەر و خەباتکارێکی ماندوویینەناس و بە ئەمەگی ڕێگای ڕزگاری و سەربەستیی نەتەوەی کورد لە تەمەنی ۸۸ ساڵیدا لە شاری مەهاباد ماڵاوایی لە ژیان کرد.
کاک عومەر قازی وەک شۆڕشگێڕێکی خۆڕاگر، لەپێناوی ئازادی و سەربەستیی نەتەوەکەی لە هەر دوو قۆناغی دەسەڵاتداریی ڕێژیمی پاشایەتی و ئیسلامیدا، ڕووبەڕووی زیندان و ئەشکەنجە و ئازاری جەستەیی و دەروونی بووەتەوە، بەڵام لە بەرامبەر داگیرکەراندا هیچکات چۆکی دانەدا و بەردەوام داکۆکی لە مافە ڕەواکانی نەتەوەکەی کرد.
ناوەندی ڕاگەیاندنی حیزبی دێموکراتی کوردستان، بەبۆنەی کۆچیدوایی نەمر عومەر قازی، وێڕای دەربڕینی خەم و پەژارەی خۆی، سەرەخۆشی لە کەسوکار و بنەماڵەی بەڕێزیان و سەرجەم خەڵکی شۆڕشگێڕی کوردستان دەکا و خۆی بە شەریکی خەمیان دەزانێ.
