٥ڕۆژ دانە بەر لێدان‌و كوتانی زیندانیی سیاسیی كورد لە ورمێ

حەسەن كەماڵ ڕەمەزان، زیندانیی سیاسیی كوردی خەڵكی ڕۆژاوای كوردستان كە لە زیندانی ورمێ بەند كراوە، لە ڕۆژی شەممە تا چوارشەممە لە حاڵێك‌دا كە بە دەست‌و پێی بەستراو لە بەندی تاكەكەسیدا ڕاگیراوە، لە ماوەی ئەم چەند ڕۆژەدا لە لایەن كاربەدەستانی زیندانی ورمێ بە بەردەوامی كەوتۆتە بەر لێدان‌و كوتان و ئەزیەت و ئازارێكی زۆر دراوە.
بەپێی ڕاپۆرتی كۆمه‌ڵه‌ی چالاكانی مافەكانی مرۆڤ لە ئێران، حەسەن ڕەمەزان كەماڵ، زیندانیی سیاسی‌و هاونیشتمانیی كوردی خەڵكی ڕۆژاوای كوردستان لە زیندانی ورمێ ڕۆژی شەممە لەگەڵ یەكێك لە كاربەدەستانی ئەم زیندانە تووشی دەمەقاڵە بووە. ناوبراو پاش ئەم دەمەقاڵەیە ڕاپێچی زیندانی تاكەكەسی كراوەو لە حاڵێك‌دا كە دەست‌و پێیان بەستووە، لە ماوەی ئەم چەند ڕۆژەدا لە لایەن “سەفەری”، سەرۆكی زیندان و یەكێك لە مەئموورەكانی ئەم زیندانە بە ناوی “ئەمیر قەرەباقی زەكاوەكان” بێ پسانەوە كەوتۆتە بەر لێدان‌و كوتان و لە ئەنجامدا پاش ئەشكەنجە‌و ئازارێكی زۆر ڕۆژی چوارشەممە بۆ بەندی گشتی نێردراوه‌ته‌وه‌.
حەسەن كەماڵ ڕەمەزان، زیندانیی كوردی خەڵكی ڕۆژاوای كوردستان كە لە زیندانی ورمێ توند كراوە، لە مانگی خەرمانانی ساڵی ١٣٩٣ بە تۆمەتی هەوڵدان بەدژی ئەمنیەتی میللی لە ڕێگەی هاوكاری كردنی یەكێك لە حیزبە كوردییەكانی دژبەری ڕێژیمی كۆماری ئیسلامی، لە لایەن ئیتلاعاتی سپای پاسدارانەوە دەستبەسەر كرا.