پتر لە پەنجا کەس لە چالاکانی مەدەنی و فەرهەنگی و ئەو کەسانەی فێستیڤاڵی نەورۆزییان بەڕێوە بردوە، لەلایەن هێزی سەرکوتگەری ڕێژێمی ئێرانەوە دەسبەسەر و ئەشکەنجە کراون.
بەپێی زانیارییەکان پتر لە بیست کەس لە دەستگیرکراوەکانی شارەکانی کوردستانی ڕۆژهەلات خەڵکی “سنە”ن کە ناوی بەشێکیان بریتییە لە: ئومێد شێخی، سامان میرەکی، ئارمان سەلیمی لەگەڵ دوو کەسیتر کە لەلایەن ئیتلاعاتی سوپای پاسدارانەوە گیراون و هەنووکە لە “قەرارگای شەهرامفەر” دەستبەسەرن. کەیوان زەندکەریمی، سۆراب جەلیالی، جەماڵ ئەسەدی، عابد خورشیدی، فەردین پەیمانکار، جەمشید فەرزی، فوئاد عەنایەتی، سەهەند بەرزنجی، کەیهان کاکەخانی، ئارەش شەکیبا، خالید حسێنی، لەلایەن ئیتلاعاتی هێزە ئینتیزامییەکان و شێرکۆ و پەیام مینبەری و سێ کەسیتر لەلایەن ئیدارەی ئیتلاعاتەوە دەستگیر کراون.
لە نێو دەستگیرکراوەکاندا لە گەنجی تەمەن ٢٠ ساڵەوە هەیە هەتا کەسی پتر لە ٦٠ ساڵ و بەپێی وتەی بنەماڵەی هەندێ لە دەستگیرکراوەکان، ئەو کەسانەی ناویان هاتووە لەلایەن هێزەکانی داگیرکەریی ڕژێمی ئێرانەوە سووکایەتیی زۆریان پێ کراوە و هەمووجۆرە ئەشکەنجەیەکی جەستەیی و دەروونی دراون و تۆمەتی سیخوڕی دراوەتە پاڵیان.
