بەدیعە مینبەری، خوشکی شەهید کەریم مینبەری لە ئاوایی “نییەر”ـی سەر بە ناوچەی سنە بەهۆی جەڵتەی مێشکەوە ماڵاوایی لە ژیان کرد.
بەپێی هەواڵی گەیشتوو بە ناوەندی ڕاگەیاندنی حیزبی دێموکراتی کوردستان، لە ماوەی ڕۆژانی ڕابردوودا، خاتوو بەدیعە مینبەری، خوشکی شەهید کەریم مینبەری، ناسراو بە “کەریم پیرباخی” شەهیدی حیزبی دێموراتی کوردستان، بەهۆی جەڵتەی مێشکەوە لە ئاوایی نیەر سەر بە پارێگای سنە ماڵاوایی لە ژیان کرد و لەنێو ئاپۆرای خەڵکی نیشتمانپەروەری ناوچەکەدا ئەسپەردەی خاکی پیرۆزی کوردستان کرا.
خاتوو بەدیعە مینبەری جگە لەوەی خوشکی شەهید کەریم پیرباخی، پێشمەرگە و فەرماندەی قارەمانی هێزی بێستوون بوو، پووری شەهید ڕێبوار و ئامۆزای شەهید ڕەحیم مینبەرییە و لەنێو بنەماڵەیەکی نیشتمانپەروەر و خاوەن شەهیدی ڕێبازی پیرۆزی حیزبی دێموکرات پەروەردە کرا و ژمارەیەکی زۆر لە خەڵکی نییەر و گوندەکانی دەوروبەر و ناوچەکە لە بەخاکسپاردن و کۆڕی هاوخەمی بنەمالەیاندا بەشدارییان کرد و دڵسۆزانە بە خاکی پیرۆزی کوردستانیان ئەسپەردە کرد.
ناوەندی ڕاگەیاندنی حیزبی دێموکراتی کوردستان، بەبۆنەی کۆچی‌دوایی خاتوو بەدیعە مینبەری، سەرەخۆشی لە بنەماڵەی بەڕێزیان و سەرجەم خەڵکی شۆڕشگێڕی گوندی نییەر دەکا و خۆی بە شەریکی خەمیان دەزانێ.
