بەبۆنەی ١٠ی خاکەلێوە ساڵڕۆژی لەسێدارەدانی پێشەوا قازی محەممەد و هاوڕێیانی و ڕۆژی شەهیدانی کوردستان، ڕێوڕەسمێکی بەشکۆ لە گۆڕستانی شەهیدانی حیزبی دێموکرات بەڕێوە چوو.
پاشنیوەڕۆی ڕۆژی سێشەممە ٩ی خاکەلێوەی ١٤٠١ی هەتاوی، بە بەشداریی سەدان کەس لە کادر و پێشمەرگە و بنەماڵەی سەربەرزی شەهیدانی حیزبی دێموکراتی کوردستان لە گۆڕستانی شەهیدان، ڕێوڕەسمێکی بەشکۆ بەبۆنەی ڕۆژی شەهیدانی کوردستان بەڕێوەچوو و سەرەتای ڕێوڕەسمەکە بە سروودی “ئەی شەهیدان” و ساتێک بێدەنگی بۆ ڕێزگرتن لە گیانی پاکی شەهیدانی کورد و کوردستان دەستی پێکرد.
دواتر بەڕێز کاک حەسەن ڕەستگار، تێکۆشەری دێرینی ناو ڕیزەکانی حیزبی دێموکراتی کوردستان، تاجەگوڵینەی وەفای لەسەر مۆنۆمێنتی شەهیدان دانا و بۆ ڕێزگرتن لە خەباتی شەهیدان ساتێک بەپێوە ڕاوەستا و پەیمانی لەگەڵ شەهیدان نوێ کردەوە، هەروەها بەڕێز مستەفا مەولوودی جێگری سکرتێری گشتیی حیزبی دێموکراتی کوردستان بەو بۆنەوە پەیامی دەفتەری سیاسیی حیزبی دێموکراتی کوردستانی پێشکەش بە بەشداربووانی ڕێوڕەسمەکە کرد.
لە بڕگەیەکی دیکەی ڕێوڕەسمەکەدا، خاتوو خەدیجە مەعزووری ئەندامی کۆمیتەی ناوەندی حیزبی دێموکراتی کوردستان و بەرپرسی کۆمیسیۆنی کۆمەڵایەتیی حیزب، پەیامی ڕێزلێنانی حیزبی دێموکراتی کوردستانی لە بنەماڵەی سەربەرزی شەهیدان خوێندەوە؛ لە پەیامەکەدا خاتوو خەدیجە سڵاوی بۆ گیانی پاکی هەموو شەهیدانی کوردستان نارد و بەڵێن و پەیمانی لەگەڵ نوێ کردنەوە و وتی: بنەماڵەی سەربەرزی شەهیدان سەرەڕای لەدەستدانی ئازیزانیان لە ڕێگەی خەبات و تێکۆشان، شێلگیرانە درێژەدەری ڕێبازی شەهیدانی خۆیانن و تا گەیشتن بە ئامانجی شەهیدان لەسەر ئەو رێبازە سوور و بەردەوامن.
لە درێژەی ڕێوڕەسمەکەدا لەلایەن کۆڕی هونەریی حیزبی دێموکراتی کوردستانەوە دوو سروودی تایبەت بەو بۆنەوە پێشکەش کرا.
هەروەها بەشداربووان و بنەماڵەی سەربەرزی شەهیدان، بۆ بەڵێن و پەیمان نوێکردنەوە لەگەڵ شەهیدان، لەسەر گڵکۆی شەهیدان گوڵی سووریان دانا و بەڵێنیان دا تا گەیشتن بە ئازادی و ئامانجی شەهیدان لەسەر ئەو ڕێبازە بەردەوام بن و درێژەدەری ئەو ڕێبازە پیرۆزە بن.
