داخران و نیوەداخرانی سەدی ٣٣ی پیشەسازی له‌ ئیلام

جێگری كاروباری كانزاو ‌ پیشەسازییەكانی ڕێكخراوی سەنعەت، كانزا‌و بازرگانیی ئیلام گوتی: لە ئێستادا سەدی ٣٣ی یەكە بەرهەمهێنەرو سەنعەتییەكانی ئەم پارێزگایە داخراون یان به‌ نیوەداخراوی درێژه‌ به‌ کارو چالاکیی خۆیان ده‌ده‌ن.
ڕەزا محەممەدڕەحیمی ڕایگەیاند ١٤١ یەكەی سەنعەتی‌و بەرهەمهێنەری ئەم پارێزگایە بە یەكجاری لە كار كەوتوون‌و ٤٢ كارگەی دیكەش لە حاڵەتی نیوەداخران دان. ناوبراو هەروەها گوتی: بەپێی دوایین لێكۆڵینەوەكان، ده‌وڵه‌ت به‌ پیدانی ١٣٢ میلیارد تمەن دەتوانێ ٣٠ یەكەی نیوەچالاك و ٨٦ یەكەی داخراو ببووژێننەوە‌و سەر لەنوێ وەگەڕیان بخەنەوە.
جێگری ڕێكخراوی سەنعەت، كانزاو بازرگانیی ئیلام گرینگترین گرفتەكان‌و سەرەكیترین هۆكارەكانی لەكاروەستان‌و نیوەچالاك بوونی كارگە سەنعەتی‌و بەرهەمهێنەرەكانی پارێزگای ئیلامی بۆ نەبوونی سەرمایە، كۆن بوون‌و له‌ که‌لک که‌وتنی دەزگاو كەرستەكان و بەڕۆژنەكرانی پیشەسازیی هێڵی لوولە‌و مەسەلەی دابیننەبوونی شتوومەكە سەرەتاییەكان گەڕاندەوە.
لەكار وەستانی سەدی ٣٣ی پیشەسازییەكانی ئیلام لە حاڵێك دایە كە ڕۆژی پێشتریش مێهدیزادە، بەڕێوەبەری گشتیی شارۆچكە سەنعەتییەكانی پارێزگاری ورمێش ڕایگەیاندبوو نزیكەی سەدی ٣٠ یەكە سەنعەتییەكانی پارێزگای ورمێ لە كار که‌وتوون، بەڵام لە شاری مەهاباد ڕێژەی ئەم كارگە داخراوانە له‌ سەدی ٤٠ تێپه‌ڕیوه‌.